Partia Demokratike ende nuk ka caktuar drejtuesit politikë sipas qarqeve, ndërkohë që Komisioni i Vlerësimit të kandidatëve për deputet ka përmbyllur procesin dhe ka përcjellë emrat e përzgjedhur prej tij në Kryesinë e PD-së.
Lulzim Basha, kryetar i PD-së, nuk ka dhënë shumë detaje mbi kohën se kur mund të përcaktohen drejtuesit sipas qarqeve, megjithëse çdo ditë është pyetur nga mediat në daljet publike, ku ka denoncuar situatën e rëndë që po kalon vendi si pasojë e krizës ekonomike, por edhe nga pandemia e Covid-19.
Boldneës.al ka mësuar disa nga kandidatët që mund të drejtojnë fushatën e demokratëve, edhe pse zyrtarisht vendimi mund të merret në ditët dhe javët në vijim, në varësi të mbledhjes së Kryesisë së kësaj partie.
Burime nga PD shprehen se mund të ketë supriza, veçanërisht në disa nga qarqe. Kështu nga burimet mësohet se në qarkun e Beratit, si drejtues politik mund të jetë Tomorr Alizoti, anëtar i Kryesisë, i cili u votëbesua nga anëtarësia e PD-së në Tiranë si kandidat për deputet.
Genc Pollo pritet të drejtojë fushatën në Gjirokastër, atje ku për muaj me rradhë ishte Tritan Shehu, por që sipas Komisionit të Vlerësimit të kandidatëve, i duhet të presë konfirmimin në listën e dytë, bashkë me 12 ish-deputetë të tjerë.
Në qarkun e Korçës është menduar të rikthehet nënkryetari i PD-së, Edmond Spaho, i cili më parë ka qenë i angazhuar në Elbasan. Në këtë të fundit pritet të shkojë Flamur Noka, i cili drejtonte më parë qarkun e Kukësit, ndërsa së fundmi u votua nga anëtarësia në Tiranë, më konkretisht në bashkinë e Kamzës.
Enkelejd Alibeaj, i cili ka qenë i angazhuar në Fier, pritet të drejtojë fushatën në Lezhë, ku më parë ka qenë i angazhuar Aldo Bumçi.
Ndërkohë që në Tiranë janë 3 emra, Jorida Tabaku, Grida Duma dhe Belind Këlliçi, pritet të caktohet edhe një tjetër emër, duke e kthyer Tiranën me 4 drejtues politikë, kjo edhe për faktin se është qarku më i madh dhe zotëron plot 36 mandate deputetësh në tërësi.
Gazmend Bardhi nga Durrësi, ku ishte projektuar si drejtues fushate, pritet të zhvendoset në Fier dhe duket se është parë si një zgjidhje për të ulur disi tensionet pas letrës që Kryesia e degës në Fier i drejtoi Lulzim Bashës, lidhur me skualifikimin nga komisioni të Luan Baçit, kreut të degës dhe ish-deputetit në këtë qark.
Ndërkohë në Shkodër, duket se surpriza do të jetë ish-Kryeministri Sali Berisha, që ndoshta mund të kryesojë edhe listën e demokratëve, në qarkun që konsiderohet bastion i së djathtës. Berisha ka lënë të hapur opsionet se ku do të kandidojë, sikundër Basha në deklaratat publike është shprehur se ai mund të kandidojë në çdo qark.
Ndërkohë që në Durrës pritet që si drejtues politik të jetë sërisht Oerd Bylykbashi, i cili në zgjedhjet e 2017 kryesonte listën e PD-së. Në diskutim mbeten qarqet e Vlorës, Kukësit, Dibrës, ndërsa shumë prej figurave qendrore të partisë më të madhe opozitare, mund të jenë në lojë për të drejtuar fushatën.
Burime nga PD shprehen se gjithçka është një listë propozimesh, jo zyrtare, e cila mund të ndryshojë në varësi edhe të preferencave të vetë emrave të propozuar, apo vendimit të Kryesisë, bazuar në organizimin që do të bëhet.
Në disa prej qarqeve nuk përjashtohet mundësia e koordinimit me emrat e partive aleate që do të jenë pjesë e listës njëemërore të PD-së, bazuar kjo në marrëveshjet që do të realizohen në përputhje me Kodin e ri Zgjedhor./Bold/GazetaReforma.com/
