“Jap dorëheqjen nëse gjeni një lokal hapur!” Kështu ka deklaruar me pompozitet drejtori i Policisë së Shkodrës, Niko Brahimaj i pyetur në lidhje me respektimin e masave të marra për pandeminë. Në një deklaratë për mediat ai ka thënë se fokusi i policisë së Shkodrës është ruajtja e bizneseve dhe e shëndetit të qytetarëve dhe jo vënia e gjobave. Por teka përpiqej të provonte se në Shkodër nuk ka asnjë lokal hapur, ai vuri në dukje një problem edhe më ta madh me të cilin qyteti verior po përballet aktualisht; përmbytjet. Teksa gazetarët i thonë se në pedonalen e Shkodrës ka lokale hapur, drejtori thotë se pedonalja per momentin është e mbushur me ujë.
Gazetari: Në Shkodër ka ende lokale që vazhdojnë të jenë hapur pas orës 22:00…
Drejtori: Më thoni një, më thoni një lokal…
Gazetari: Në pedonale ka lokale hapur
Drejtori: Në pedonale keni ujë tani për momentin…Më thoni një emër të një lokali dhe për tre minuta do jemi bashkë atje ta shikojmë është i hapur apo i mbyllur. Më thoni një lokal hapur, jo vetëm në Shkodër, por në rrethinat dhe gjithë bashkitë në këtë orë.
Gazetari: Po nëse ka hapur si do të përgjigjeni ju?
Drejtori: Do jap dorëheqjen unë.
