Drejtori i Autoritetit Rrugor Shqiptar, Gentian Gjyli, është paraqitur më 13 maj në ambientet e Prokurorisë së Posaçme, ku është marrë zyrtarisht i pandehur në lidhje me një hetim që ka në fokus abuzimet me tenderat e rrugëve.
SPAK ka përfunduar hetimet për 25 persona, mes tyre Gjyli dhe paraardhësi i tij në krye të ARRSH-së, Evis Berberi, tashmë nën masën e sigurisë “arrest me burg”.
Ata akuzohen për shpërdorim detyre dhe shkelje të barazisë në tendera.
Gjyli është marrë në pyetje për procedurat e ndjekura gjatë kohës kur ishte zëvendësdrejtor i ARRSH-së, ndërsa drejtor ishte Evis Berberi.
Sipas hetimeve, më shumë se 10 procedura prokurimi janë objekt hetimi, dhe mes personave të përfshirë ka zyrtarë publikë, biznesmenë dhe inxhinierë të ARRSH-së.
Pas daljes nga ambientet e SPAK, Gentian Gjyli refuzoi të komentonte për gazetarët dhe i tensionuar shtyu telefonin e një gazetareje, duke thënë shkurt: “U mora i pandehur”.
Ndërkohë, ndaj Berberit është komunikuar një akuzë e re. Ai akuzohet se gjatë kohës që drejtonte ARRSH-në dhe më herët Agjencinë për Efiçencën e Energjisë, ka favorizuar kompaninë e ortakut të tij, Valter Begaj, në të paktën gjashtë tendera.
Fitimet më pas, sipas SPAK, përfundonin në një kompani që Berberi e kontrollonte në mënyrë të tërthortë.
Gentian Gjyli u emërua drejtor i ARRSH më 28 mars 2024, vetëm një javë pas arrestimit të Berberit më 14 mars me akuzat për korrupsion dhe pastrim parash. Hetimet janë duke u ndjekur nga prokurori Dritan Prençi.
