Zamir Dedej është njeriu të cilit i është besuar ruajtja e parqeve kombëtare. Ai drejton Agjencinë Kombëtare të Zonave të Mbrojtura, një institucion shtetëror në varësi të Ministrisë së Turizmit dhe Mjedisit. Sigurisht që Dedej nuk ka bërë ndonjë akt që do të mbahet mend për mbrojtjen e mjedisit, por për një tender. Është një veprim që thyen rekordin e çdo imagjinate mbi abuzimet e zyrtarëve me paratë e shtetit. Ai ka hapur një tender të rrallë.
Sipas Agjencisë së Prokurimeve, rezulton se kjo agjenci ka organizuar një tender me numër reference REF-84226-01-18-2021 dhe me objekt Shërbim parkimi për automjetet e AKZM-së. Një institucion shtetëror e siguron falas vendin e parkimit përmes një shkrese në bashkinë e Tiranës. E megjithatë, kur mëson se fitues i tenderit shpallet një hotel, atehërë nuk ka vend për diskutim. Ky zyrtar po i jep një dorë parash hotelit “The PLAZA Tirana”.
Mësohet se bëhet fjalë për 4 automjete të cilat do të parkohen për një periudhë 12-mujore në parkimin e hotelit luksoz. Për këtë shërbim agjencia do të paguajë 416,000 lekë të reja, në një kohë që fondi limit është 416,666 lekë të reja. Oferta fituese është thuajse identike me atë të fondit limit, përkatësisht sa 99.84% e tij.
Kur ky zyrtar firmos pa u skuqur nga turpi një abuzim të tillë qesharak, kuptohet se çfarë bën me Zonat e Mbrojtura. /Gazetareforma.com/
