Autoritetet italiane po përdorin të gjitha mënyrat për t’u thënë njerëzve që të qëndrojnë në shtëpi.
Së fundmi qiellgërvishtësja “Pirelli” në Milano, ku ndodhen edhe zyrat qëndrore të Këshillit të Lombardisë, u ndriçua nga shkrimi “Qëndroni në shtëpi”.
Presidenti i Asamblesë së Lombardisë, Alessandro Fermi, shkroi në Facebook, se kjo është vaksina e vetme që ka Italia kundër koronavirusit.
Sipas mediave italiane, mesazhi i ndriçuar do të shfaqet edhe gjatë netëve në vazhdim.
Fotoja e kullës së ndriçuar u publikua Facebook edhe nga guvernatori i Lombardisë, Attilio Fontana, i cili ditën e djeshme përsërit për të disatën herë apelin për qytetarët, që të qëndrojnë në shtëpi.
“Kësaj herë po ua kërkojmë me qetësi, por nëse nuk do të bindeni, do t’i kërkojmë qeverisë masa më të rrepta”, shkroi Fontana për “të pabindurit”.
Për momentin në Itali numri i të prekurve ka arritur shifrën 35713, në mesin e të cilëve 2978 viktima dhe 4025 të shëruar.
