Partia Demokratike ka bërë të ditur pasditen e sotme se ka gati draftin për reformën e re territoriale. Bashkëkryetarja e Komisionit të Posaçëm në Kuvend, Dhurata Çupi gjatë një interviste për ABC ka deklaruar se ky draft i përgatitur nga PD fillimisht do t’i prezantohet fillimisht deputetëve dhe më pas do të jetë publik.
“Kemi një raport final, do ta prezantojmë ditën e enjte”.
Drafti ka të bëjë me bashkitë e reja që mund t’i shtohen ndarjes administrative të vendit.
“Ka propozime për Paskuqanin. Është një ishull midis dy njësive, është tejkaluar nga bashkia Tiranë. Apo Zall Herri t’i bashkohet Tiranës. Kemi propozuar për bashki Shëngjinin, Orikumin.”
Çupi deklaron se në draftin e demokratëve do të kërkohet edhe nisja e referendumeve.
“Një nga pikat kyçe është edhe miratimi i ligjit dhe funksionaliteti i shërbimeve”.
Pavarësisht draftit të hartuar nga Partia Demokratike, mazhoranca socialiste ka bërë të qartë që në nisje të komisionit për Reformën Territoriale se nuk do ta mbështesë një ndarje administrative të vendit më të madhe se 61 bashki që është aktualisht. Kujtojmë se afati final i komisionit të posaçëm për Reformën Territoriale është data 30 shtator. Ende nuk dihet me saktësi çfarë përmban projekti i PD, por sipas deklaratave të mazhorancës ky draft projekt nuk pritet të miratohet si shumë të tjerë të prezantuar nga opozita.
