Teksa është thënë se Lulzim Basha ka takuar në fshehtësi kreun e Grupit Parlamentar të PS-së, Taulant Ballën, ish-ministri i Drejtësisë, Ylli Manjani ka ironizuar dy eksponentët politikë. Nëpërmjet një statusi në rrjetet sociale, Manjani thotë se ka dëgjuar burra që kërkojnë çelësa shtëpie për të takuar femra, por shprehet se Basha kërkon çelësa për Ballën. Ai deklaron se takimi i tyre në shtëpinë e dikujt, në orë të vonë, nuk ngjan aspak mirë.
“Kisha dëgjuar për burra që lypin çelës shtëpie për të shkuar me femra. Luli paska lyp çelës për të shkuar me Taulantin. Mund të ishin takuar në cilëndo zyrë të Parlamentit, në cilëndo kafe të Tiranës dhe sdo kishim asnjë dyshim për qëllimin politik të takimit. Po në një shtëpi të dikujt tjetër, në orë të vonë dhe, si ilegalet nuk ngjan hiç mirë. Nejse, nuk na takon të merremi me punët dhe shijet private të askujt…”, thekson ish-ministri.
Kujtojmë se më herët gazetari Bledian Koka deklaroi në “Task Force”, në Syri Tv, se Lulzim Basha është takuar me Taulant Ballën.
Sipas tij, takimi është zhvilluar dy javë më parë. Ai bëri të ditura detajet e pazarit duke shtuar se në këtë takim është diskutuar që grupimi Alibeaj të dilte me kandidatë në 61 bashkitë e vendit.
