Prokuroria e Posaçme ka thirrur kreun e grupit parlamentar të Partisë Demokratike, Gazment Bardhi për të dhënë dëshmi për dosjen ‘Xibraka’ më datë 24 maj. Vetë Bardhi përmes një letre, i kërkoi SPAK-ut që t’i caktojë një datë të re për t’u marrë në pyetje, dhe jo 15 Majin, siç e kishte kërkuar Prokuroria e Posaçme.
NJOFTIMI:
Në vijim të kërkesës së Kreut të Grupit të PD Gazment Bardhi për pamundësinë për tu paraqitur nesër në SPAK, për shkak të një vizite zyrtare në Bundestag, ju informoj se z. Bardhi do të paraqitet më datë 24.05.2024, ditën e premte, ora 10:00, me qëllim pyetjen e tij si person që ka dijeni për rrethana të hetimit, në lidhje me procedimin penal nr. 88, të vitit 2024, të regjistruar në Prokurorinë e Posaçme Kundër Korrupsionit dhe Krimit të Organizuar, pas rifillimit të hetimeve të pezulluara në lidhje me procedimin penal nr. 335/1 (dojsa “Xibraka”), të vitit 2016 të regjistruar në ish-Prokurorinë pranë Gjykatës së Shkallës së Parë për Krime të Renda, Tiranë.
Kreu i grupit parlamentar të PD-së është thirrur në SPAK, për të dhënë informacione në lidhje me dosjen Xibraka, dhe denoncimin që ai ka bërë se i përfshirë në laboratorin e kokainës, ka qenë dhe vëllai i kryeministrit shqiptar Olsi Rama. Pak javë më parë, Bardhi, akuzoi Olsi Ramën si pjesë e grupit të laboratorit të kokainës në Xibrakë.
