Gjykata Kushtetuese ka rrëzuar kërkesën e biznesmenit Pëllumb Gjoka, i cili pretendonte pavlefshmërinë e provave të siguruara nga komunikimet në platformat e koduara “Sky ECC” dhe “EncroChat”.
Gjoka, i arrestuar për llogari të SPAK në kuadër të dosjes “Metamorfoza”, kërkoi shfuqizimin e disa vendimeve të Gjykatës së Posaçme dhe të Gjykatës së Lartë, që kishin konfirmuar masën e sigurisë “arrest në burg” ndaj tij. Hetimet e kësaj dosjeje kanë zbuluar jo vetëm aktivitetin e grupeve kriminale në Shqipëri, por edhe përfshirjen e disa zyrtarëve të lartë, si ish-drejtori i policisë Oltion Bistri dhe prokurori Xhevahir Lita, të cilët figurojnë në përgjimet e “Sky ECC”.
Gjoka kërkoi nga Kushtetuesja që të shpallte si të papajtueshme me Kushtetutën vendimet e mëparshme të gjykatave, por kërkesa e tij u hodh poshtë, duke i dhënë vazhdimësi procesit të ndjekjes penale ndaj tij.
