Seanca e radhës për çështjen e koncesionit të sterilizimit në GJKKO është shtyrë, pasi mungonin avokatët mbrojtës.
Ish-ministri i Shëndetësisë, Ilir Beqaj, ka zgjeruar ekipin e tij ligjor, duke shtuar përkrah avokatit Ermal Yzeiri edhe Florian Bonjakun si përfaqësues në proces.
Beqaj po gjykohet nën masën e arrestit shtëpiak për aferën e sterilizimit, ndërkohë që ndodhet i paraburgosur për një tjetër dosje ,atë të SASPAC , ku akuzohet për shpërdorim fondesh të Bashkimit Europian.
Në një seancë të mëparshme, ai kërkoi shtyrjen e gjyqit për shkak të problemeve shëndetësore dhe dorëzoi dokumentacion mjekësor për medikamentet që përdor në qeli.
Ndaj tij dhe të pandehurve të tjerë, përfshirë Ermal Kurtulajn, Bledar Lekën, Gazmend Haxhiën dhe Mira Topçiun, SPAK ka ngritur një sërë akuzash që variojnë nga korrupsioni pasiv e mashtrimi, deri te falsifikimi i dokumenteve, shkelja e barazisë në tendera dhe fshehja e pasurisë.
