Ditën e sotme deputeti PD, Agron Shehaj ka reaguar në lidhje me dosjen e inceneratorëve, për të cilën u vu në pranga ish-ministri i Mjedisit në qeverinë “Rama 1”, Lefter Koka.
Shehaj thekson se SPAK duhet të ndalë vjedhjen e të vendosë nën sekuestro inceneratorin fantazmë të Tiranës, që ka një vlerë prej 430 milionë euro.
‘Pavarësisht se janë në arrati, të akuzuarit për korrupsion nga SPAK për aferën prej 50 milionë euro të inceneratorëve të Elbasanit dhe Fierit, vazhdojnë të përfitojnë para nga koncesioni i inceneratorit të Tiranës.
SPAK duhet të ndalojë vjedhjen dhe të vendosë nën sekuestro inceneratorin fantazmë të Tiranës prej 430 milionë euro, ku janë serish të përfshirë të njëjtët njerëz të cilët janë nën urdhër arresti për korrupsion në aferën e Fierit dhe Elbasanit”, tha ai.
Kujtojmë se SPAK arrestoi ish-ministrin e Mjedisit, Lefter Koka për dosjen e inceneratorit në Elbasan. Lefter Koka u vu në pranga në banesën e tij në Durrës gjatë paradites së të martës, ndërsa gjyqtari Erion Bani më herët kishte vulosur urdhër arrestin e kërkuar nga prokurori Klodian Braho dy ditë më parë.
SPAK e akuzoi Lefter Kokën për shpërdorim të detyrës, pastrim të parave dhe korrupsion, tre akuza të rënda me të cilat ish-ministri tashmë do nisë betejën e tij me drejtësinë. Në të njëjtën skemë, të korrupsionit me inceneratorët, burime nga SPAK thonë se janë shpallur në kërkim edhe S. G, e cila në sistemin TIMS rezulton se është jashtë shtetit si dhe K. Z. Janë vendosur në sekuestruo preventive kompanitë “Albtek Energy”, pra inceneratori i Elbasanit, “Integrated Technology Services” si edhe aksionet e Kokës në “Kantinën e Pijeve Gjergj Kastrioti Skenderbeu”.
