Gjykata e Posaçme kundër Korrupsionit dhe Krimit të Organizuar ka vendosur të kalojë për gjykim dosjen e njohur si “Buka”, në të cilën ish-zv/kryeministri Arben Ahmetaj është marrë i pandehur nga SPAK për veprën penale të “shpërdorimit të detyrës”.
Sipas SPAK, Ahmetaj dyshohet se ka favorizuar privatizimin e shoqërisë “Buka sh.a.” në kohën kur mbante postin e ministrit të Financave, duke i shkaktuar buxhetit të shtetit një dëm prej rreth 7 miliardë lekësh.
Në fokus të hetimeve është edhe biznesmeni Lirim Fezollari, i cili përfitoi nga ky privatizim, ndërsa SPAK dyshon se mes tij dhe Ahmetajt kishte marrëdhënie jo vetëm institucionale.
Gjykata ka vendosur të shqyrtojë vetëm rolin e Ahmetajt në këtë çështje, ndërkohë që dosjet për Fezollarin dhe disa përfaqësues të Ministrisë së Financave janë ndarë.
Pas më shumë se dy vitesh hetime dhe disa kthime të dosjes për plotësim, GJKKO ka pranuar së fundmi kërkesën e SPAK për gjykim në themel.
Në dokumentet e prokurorisë thuhet se kompleksi “Emerald” në zonën e “5 Majit” në Tiranë është ndërtuar pikërisht mbi ish-pronën e shoqërisë “Buka”, një pronë për të cilën familja Myderizi kishte fituar proceset gjyqësore.
Në reagimin e tij publik, Ahmetaj i ka cilësuar akuzat të pabaza dhe ka denoncuar mënyrën si po zhvillohen hetimet dhe komunikimi publik nga SPAK:
“Si ka mundësi që akuzat ndaj meje rrjedhin në media e portale të ndryshme përpara se të ndiqet rruga ligjore ose të paktën të ndiqet e njëjta rrugë që SPAK ka ndjekur për dosjet e tjera deri më tani? Njoftimi i avokatëve mbi akuzat. Si edhe në rastin e dosjes së Inceneratorëve (vetëm për personin Arben Ahmetaj) dosjet dalin në media para se të ketë njoftime zyrtare. Mos vallë është vazhdë e strategjisë së “Deles së zezë” nga spin doctor/s? A mos është kjo një strategji për një gjyq popullor në media përpara se i prezumuari i pafajshëm të shkojë “i fajshëm” në gjykatë? Ky ka qenë stil i Vyshinsky-t, por 90 vjet më parë e në diktaturë”, deklaronte më herët Ahmetaj.
Ai ka mohuar gjithashtu që privatizimi i ish-fabrikës të ketë shkaktuar dëm shtetit:
“Si ka mundësi që SPAK anashkalon faktin që aksionet shtetërore janë mbrojtur dhe jo e kundërta? Si ka mundësi që SPAK injoron apo anashkalon rolin e Ministrit të Ekonomisë si person politik? Si ka mundësi që SPAK anashkalon apo injoron faktin ligjor që Ministri i Ekonomisë nuk bën vlerësim apo rivlerësim asetesh dhe aksionesh, por kjo pjesë e procedurës bëhet nga vlerësues të pavarur e të certifikuar të cilët janë në listën zyrtare të institucionit”.
