Pranvera Shahinasi ka dhënë dëshminë e saj para organeve të drejtësisë në lidhje me hetimet për dosjen “5D”.
Ajo ka treguar se ka punuar si ekonomiste në sektorin e financës në kompaninë “Igor Elektrik” gjatë periudhës 2016-2019, fillimisht nën drejtimin e administratorit Eduart Meta, dhe më pas nën atë të Nestor Muhametllarit, i cili zëvendësoi Metën.
Shahinasi ka sqaruar se detyrat në punë ia caktonte drejtuesi dhe nuk ka pasur përgjegjësi për arkën apo menaxhimin e parasë në kompani.
Lidhur me dokumentet që përmbanin përshkrimin “honorar”, ajo nuk e ka pasur të qartë përmbajtjen e tyre, duke shpjeguar se mund të jenë pagesa për shërbime të ndryshme. Gjithashtu, Shahinasi ka përmendur emrin e Mariglen Qatos, të cilin e njeh si person që ka frekuentuar zyrat e kompanisë dhe ka pasur kontakte me administratorin.
Në disa raste, me kërkesë të administratorit, ajo ka dërguar dokumente financiare përmes e-mailit, përfshirë edhe një listë përmbledhëse me informacion financiar që i është dërguar Qatos.
Në dëshminë e saj, Shahinasi tregon se “detyrat na i caktonte administratori Eduart Meta. Më pas u ndërrua me Nestor Muhametllari. Unë kam aplikuar në faqet e punësimit. Nestorin e pata parë edhe me herët në shoqëri. Kur vinte ai takonte administratorin Meta. Ne merreshim me punime elektrike, kryesisht. Ne mbanim mandat pagesa ne shoqëri. I firmoste edhe administratori. Para cash në zyrë unë nuk kam mbajtur. Pjesën e arkës nuk e kisha unë. Dokumente me përshkrimin ‘honorar’ nuk është se mbaj mend. Ka kaluar edhe shumë kohë. Më kanë pyetur për këtë edhe më herët në prokurori. Po, e kam parë në dokumente të shoqërisë. Mund të kenë qenë lekë që mund të jenë dhënë për dikë. Ishin pagesa për shërbime. Mariglen Qaton e njoh. Ka qenë person që ka ardhur në zyrat e shoqërisë. E kam parë më shumë se një herë. Kur vinte takonte administratorin. Nuk mund ta them nëse Mariglen Qato ishte ortak i shoqërisë. Në QKB ortak ishte Eduardi. E-mailin e shoqërisë e ka përdorur me herët edhe bashkëshortja e Eduardit, pasi ishte ekonomiste. Kur më kanë dhanë direksione për të dërguar maile e kam bërë. Edhe mundet t’i kem dërguar mail Mariglen Qatos. Kur më thoshte administratori këtë informacion do ia dërgosh filan personi e dërgoja.”
Dosja “5D” u bë objekt i hetimeve të Prokurorisë së Posaçme Antikorrupsion, e cila më 2 korrik 2024 i komunikoi akuzat për “korrupsion pasiv” dhe “mosdeklarim të pasurisë” ndaj Redian Mollës dhe Mariglen Qatos, ndërsa Taulant Tushes i është ngarkuar akuza për “shkelje të barazisë në tendera”. Tre ish-drejtorët u arrestuan në mars të vitit të kaluar, duke marrë masën e “arrestit në burg”, ndërsa pesë persona të tjerë u vu nën “detyrim paraqitje”, mes tyre Enton Punavija, Julian Zanaj, Albano Janku, Nestor Muhametllari, Deborah Keçi dhe Englatina Zere.
Sipas SPAK, Mariglen Qato dhe Redian Molla janë pronarë de facto të kompanisë “5D”, e cila në periudhën 2016-2022 ka fituar 11 tendera pranë bashkisë, duke operuar me emra të ndryshëm si “Igor Electric” dhe “Vas Construction”. Hetimet vijojnë për zbardhjen e të gjitha detajeve të kësaj çështjeje.
