Gjykata e Apelit të Durrësit, ka marrë ditën e sotme vendimin për të liruar nga burgu 5 komisionerë të arrestuar në kuadër të përgjimeve nga dosja 339 për akuzat për vjedhje të votave në zgjedhjet e vitit 2017.
Ndërkohë 3 komisionerë të tjerë kanë mbetur në burg pasi nuk kishin apeluar masën e vendosur më herët nga gjykata e Shkallës së Parë në Durrës.
Kujtojmë se në total prej dosjes 339 kanë qenë të pandehur 21 komisionerë, ndërkohë që vetëm tre prej tyre kanë mbetur ende në burg.
21 komisionerët e arrestuar për shkelje në zgjedhjet e vitit 2017, kanë dalë sot para gjykatës së Apelit në Durrës. Pas shpalljes së moskompetencës nga gjykata e Posaçme e Apelit, sot gjykata e Durrësit ka bërë caktimin e masave të sigurisë për të pandehurit, pjesë e dosjes “339”.
Avokatët e të pandehurve kanë dkelaruar se janë njoftuar me vonesë për proceset ligjore të klientëve të tyre, dhe kjo sipas tyre është në kundërshtim me nenin 249 të Kodit të Procedurës Penale.
Juristët thanë se gjykimi është bërë me standarte të dyfishta, e mbi baza partiake. “Masa e sigurisë, arrest me burg është dhënë vetëm për komisionerët e opozitës”, kanë thënë avokatët mbrojtës të komisionerëve.
Avokatët gjithashtu kanë hedhur dyshime për gjyqtarët, e sidomos për relatorin e çështjes. Tritan Hamiti do të kalojë më 10 shtator në Vetting, e sipas mbrojtjes, është i “kompromentuar”.
Kujtojmë se arrestimi i 21 komisionerëve të dosjes “339” u bë vetëm disa javë më parë nga Struktura e Posaçme Anti-Korrupsion (SPAK). Po ashtu SPAK shpalli moskompetencën me argumentin se ka fakte për grup kriminal, dhe dosja i kaloi prokurorisë së Durrësit.
Hetimi i dosjes 339 kaloi edhe në momente qesharake, ku vetëm disa orë pas ekzekutimit të urdhër-arresteve, dy komisionerët e PD dhe PS, rezultuan të vdekur që në kohën kur prokurorët po hetonin shit-blerjen e votave në Durrës.
Dosja 339 filloi që të regjistrohej që prej vitit 2016, pas një sinjalizimi nga autoritetet gjermane për trafikun e drogës që bëhej nga qyteti i Durrësit. Me hapjen e hetimit, përgjimet zbuluan edhe krime të tjera si shitblerje votash, korrupsion, trafik droge apo tjetërsim pronash.
