I shumëkërkuari Klement Balili është vetëdorëzuar në Policinë e Shtetit mëngjesin e kësaj të marte.
Lajmi konfirmohet për Top Channel nga njëri prej avokatëve të tij, Baftjar Rusi.
Balili ndodhet në Policinë e Shtetit së bashku me avokatin tjetër, Theodhori Sollaku.
Vetëdorëzimi i tij vjen vetëm pak ditë pasi një burim nga Ministria e Drejtësisë njoftoi se Greqia i është përgjigjur në fund të dhjetorit të kaluar, përmes një letërporosie, kërkesës së Prokurorisë së Krimeve të Rënda, që këmbëngulte t’i dorëzoheshin prova shtesë të 46-vjeçarit.
Kjo letërporosi ishte justifikimi kryesor i Prokurorisë, që në vitin 2018 zgjati tri herë afatin hetimor për Balilin, i etiketuar ndryshe si “Eskobari i Ballkanit”, por që për shkak të dështimit të policisë për ta arrestuar u quajt nga ish-ambasadori Donald Lu edhe si “magjistari”.
Prej dy vitesh, Klement Balili vazhdon ta kthejë duarbosh policinë gjatë aksioneve të dështuara për arrestimin e tij. Tashmë, sfida e radhës nuk është për uniformat blu, por për Prokurorinë.
Po ashtu pak më herët edhe ish-kryeministri Sali Berisha në facebook-un e tij, konfirmoi këtë lajm.
Sipas Berishës, i cili i referohet mesazhit të një qytetari dixhital, Balili është dorëzuar te Prokuroria e Krimeve të Rënda, ndërsa shton se është nisur drejt Tiranës me Rigels Balilin.
“Dorëzohet Klement Balili! Qytetari dixhital informon. Përshëndetje doktor, vetëdorëzohet Klement Balili në prokurorin e Krimeve të Rënda, ai është nisur drejt Tiranës me Rigels Balilin” shkruan Berisha.
I cilësuar si ‘Escobari i Ballkanit’ baroni i drogës është i akuzuar për trafik ndërkombëtar të lëndëve narkotike. Policia në harkun e dy viteve ka dështuar që ta prangosë në shumë operacione të zhvilluara në disa qytete në jug të vendit, ndërsa sipas Berishës sot është dorëzuar.
