Ish-udhëheqësi i Bashkimit Evropian dhe ish-kryeministri Donald Tusk është zgjedhur kreu i partisë më të fortë në opozitën e copëtuar të Polonisë.
Tusk, 64 vjeç, tha se po kthehej në politikën polake dhe në partinë e opozitës Platforma Qytetare për të ndihmuar në luftën kundër “së keqes” së qeverisë aktuale të krahut të djathtë.
Tusk bashkë-themeloi Platformën Qytetare, një parti qendër-liberale, në vitin 2001. Ajo drejtoi Poloninë për tetë vjet – shumicën e kohës me Tusk si kryeministër – para se partia konservatore të fitonte pushtetin në vitin 2015.
“Unë e di se shumë polakë po prisnin që kjo ëndërr e zezë të mbaronte. Sot, e keqja sundon në Poloni dhe ne jemi gati të luftojmë kundër kësaj të keqeje”, tha Tusk në lidhje me qeverinë aktuale të partisë Ligji dhe Drejtësia që ka vendosur Poloninë në një kurs përplasjeje me BE.
Tusk tha se kthimi i tij u diktua nga bindja se Platforma Qytetare ishte e nevojshme si forca që mund të fitojë betejën me Ligjin dhe Drejtësinë mbi të ardhmen e Polonisë. Ai tha se kishte gjithashtu një ndjenjë përgjegjësie për partinë që kishte themeluar dhe udhëhequr për shumë vite përpara se të merrte pozicionin e kryetarit të Këshillit të BE në vitin 2014.
