Administrata e presidentit Donald Trump vijon të ndërmarrë politika kundër emigrantëve.
I tillë është edhe hapi i fundit.
Të enjten administrata publikoi rregulla të reja vizash që synojnë kufizimin e “turizmit të lindjeve”.
Sipas kësaj “praktike” gratë shtatzëna shkojnë në SHBA për të lindur fëmijën, në mënyrë që i sapolinduri të marri nënshtetësinë amerikane.
Sipas Kushtetutës amerikane, kushdo që ka lindur në SHBA konsiderohet shtetas amerikan.
Aplikantëve do t’u refuzohen vizat turistike nëse zyrtarët konsullorë përcaktojnë se ato synojnë të vijnë në SHBA kryesisht për të lindur.
Kjo praktikë është në thelb e ligjshme, megjithëse ka patur raste që autoritetet kanë arrestuar operatorët e agjencive të turizmit të lindjeve për mashtrime me vizat ose evazion fiskal.
Administrata e Presidentit Donald Trump po i kufizon të gjitha format e imigracionit, por Presidenti Trump ka shprehur shqetësim të veçantë për çështjen e marrjes së nënshtetësisë me anë të lindjes.
Presidenti ka kërcënuar se do t’i japë fund kësaj praktike, por studiuesit ligjorë kanë thënë se kjo nuk është aq e lehtë për t’u realizuar.
