Në qendrën shëndetësore të fshatit Zhanë, një dollap i vjetër është kthyer sot në dhomë të fshehtë votimi, duke simbolizuar mënyrën se si vijon procesi në kushte të vështira, por me përkushtim ndaj demokracisë.
Sot, më 11 maj 2025, shqiptarët i drejtohen kutive të votimit për të zgjedhur përfaqësuesit e tyre në parlamentin e ri. Janë rreth 3.7 milionë qytetarë me të drejtë vote, të cilët do të përcaktojnë 140 deputetët që do të ulen në Kuvend.
Procesi i votimit ka nisur në orën 07:00 dhe do të vijojë deri në 19:00, ndërsa për herë të parë në historinë e zgjedhjeve në Shqipëri, edhe diaspora është përfshirë në votim, pas regjistrimit të mbi 245 mijë emigrantëve shqiptarë.
Në garë janë 11 subjekte dhe koalicione politike, me kandidatë të vendosur në lista të hapura dhe të mbyllura, që synojnë të sigurojnë shumicën parlamentare për mandatin e ardhshëm.
