Ditën e sotme gazetari Artan Hoxha ka folur gjerë e gjatë rreth Dritan Rexhepit, i akuzuar për pengmarrjen e Jani Prengës.
Ai fillimisht ka zbuluar disa detaje rreth tij, ndërsa i ka marrë edhe një intervistë telefonike nga burgu i Ekuadorit.
Hoxha tregon se Dritan Rexhepi posedon aftësi të veçanta dhe është në një nivel tjetër në botën e krimit.
Ai i ka treguar gazetarit se ka një imagjinatë të zhvilluar në botën e krimit, si dhe mënyrën si u arratis nga burgu i Belgjikës.
“Më punon fantazia për arratisje e plane. Kujt nuk i punon në të tilla raste. Vazhdimisht kam ide atraktive që më bëjnë të realizojë planin që kam. Fillimisht u arratisa nga burgu i Shqipërisë, më pas nga Itali e së fundmi nga burgu i Belgjikës.Në Belgjikë kam shfrytëzuar një periudhë kohe kur në burg bëheshin punime. U vesha si një punonjës dhe u arratisa nga Evropa.”
Më pas, Hoxha tregon se Rexhepi u shfaq më 26 qershor 2014 në Ekuador, kur ishte në listën e 10 personave më të kërkuar të Interpolit.
Ai u kap 249 kg kokainë, gjë të cilën e ka pranuar edhe vetë, dhe u dënua me 13 vite burg.
Më pas gazetari u shpreh se 40-vjeçari zotëron disa aftësi, siç është fakti që flet shumë mirë 4 ose 5 gjuhë të huaja.
Gjatë bisedës telefonike Rexhepi i ka treguar Hoxhës se dëshira e tij ka qenë të bëhej jurist.
Ai i ka thënë:
“Në 2005 vijoja studimet për Drejtësi, ndërsa në 2006 u arrestova, kur isha ende student. Dëshira ishte të bëhesha jurist, por përfundova në një trafikant me juridik sepse e kam bërë universitetin duke qenë i ekspozuar përballë ligjit në shumë vende. Jeta më mori në atë rrjedhë saqë nuk kisha mundësi tjetër.”
Ndërkohë që Rexhepi ndodhet në burg në Ekuador bëhet me dije se është kërkuar ekstradimi i tij nga Shqipëria, Italia e Belgjika, ndërsa vetë i akuzuari ka pranuar të ekstradohet në Shqipëri.
Hoxha tregon se Rexhepi ka patur mundësinë të bënte operacione plastike e të fshinte shenjat e gishtave për t’i shpëtuar burgut, por ka refuzuar ta bënte këtë për motive të pazbuluara.
