Antonio Leka është dënuar me 6 vite burg nga Gjykata e Lezhës, pasi u kap në Janar të vitit 2023, me arsenal armësh me vete, duke kërcënuar se do të vriste politikanët. Ai u vu më pranga, teksa ishte i veshur me antiplumb, dhe pretendonte se ishte nisur për të vrarë politikanët e Lezhës.
Gjykata e gjeti fajtor Lekën për veprat penale “Mbajtja pa leje dhe prodhimi i armëve, armëve shpërthyese dhe i municionit” dhe “Prodhimi dhe shitja e narkotikëve” dhe në total u dënua me 9 vite burg, por përfitoj nga gjykimi i shkurtuar dhe bashkimi i dy dënimeve.
Gjatë kontrollit të ushtruar në makinën e tij, në momentin e arrestimit, policia zbuloi një arsenal të vërtetë armësh, ku iu gjetën: 1 armë zjarri pistoletë me 5 karikatorë, 1 automatik me 5 karikatorë, 550 fishekë luftarakë për pistoletën dhe automatikun, 1 palë dylbi, 1 anti-plumb ushtarak, 1 thikë, 1 çantë ushtarake, 75 gramë lëndë e dyshuar narkotike kanabis dhe rroba kamuflazhi.
Ai ishte i veshur i gjithë me uniformë ushtarake dhe anti-plumb, duke krijuar përshtypjen e personazhit artistik “Rambo”.
“…do vras politikanët e Lezhës, dhe të zhduk farën e keqe të tyre…” – ka pohuar Leka, në dëshminë e tij një vit më parë.
