Një akt trimërie nga një emigrant shqiptar në Londër ka tërhequr vëmendjen e publikut dhe mediave britanike.
Hismet Smakaj, 65 vjeç, nga Shkodra dhe prej vitesh banues në Britani, është bërë simbol i guximit dhe humanizmit pasi shpëtoi një vajzë të vogël nga mbytja në lumin Thames.
Ngjarja ndodhi të shtunën, më 17 maj, në zonën Newham të Londrës Lindore. Teksa po shëtiste buzë lumit me bashkëshorten, Smakaj pa një vajzë 7-vjeçare që kishte kaluar barrierat mbrojtëse dhe ishte hedhur në ujë.
Vajza, e cila më vonë u konfirmua se ishte autike, nisi të merrej nga rrjedha e fortë e lumit.
Pa humbur kohë, Hismeti hoqi rrobat, bëri disa hapa mbrapa dhe u hodh në ujë. Pasi notoi rreth pesë metra, arriti ta kapte vajzën dhe ta sillte në breg, duke shmangur një tragjedi të mundshme.
Veprimi i tij u prit me duartrokitje nga të pranishmit, të cilët e cilësuan menjëherë si “hero”.
Policia dhe shërbimet emergjente mbërritën menjëherë në vendngjarje. Vajza iu dorëzua stafit mjekësor, ndërsa Hismet Smakaj deklaroi se nuk do ta kishte falur veten nëse nuk do ta kishte shpëtuar fëmijën.
“Nëse nuk do ta kisha ndihmuar, do më mbetej peng për gjithë jetën. Kur e kapa vajzën dhe pashë që ishte ende mbi ujë, ndjeva një lehtësim të madh. Do ta bëja sërish, pa asnjë hezitim”, u shpreh ai.
Edhe pse prindërit e vajzës nuk e kanë kontaktuar ende, Hismeti shprehet i shqetësuar për gjendjen e saj: “Nuk e di nëse është ende në spital apo është kthyer në shtëpi. Do të doja shumë të dija si është”.
Rasti i Hismet Smakajt është një rast krenarie për komunitetin shqiptar në Britani.
