SPAK ka dërguar për gjykim dosjen ndaj Amarildo Nikolli Xhanej, i cili akuzohet se së bashku me tre persona të tjerë po përgatitej të vriste Ervis Matodashajn dhe Inez Hajrullan. Hetimet dhe dëshmia e Amarildo Nikollit treguan se ky krim do të kryhej për hakmarrje dhe për të marrë kontrollin mbi lojërat e fatit.
Sipas SPAK, Leonard Luzi rekrutoi Amarildo Nikollin, të njohur si “Shkodrani”, për të vrarë në Vlorë Inez Hajrullën dhe Ervis Matodashajn. Ata ishin ndihmuar në këtë atentat edhe nga Erjon Zejno dhe Muharrem Koroveshi.
Në dosjen hetimere thuhet se “Shkodrani” do të paguhej 500 mijë euro në total, nga 250 mijë euro për secilin, për të vrarë “Sakatin” dhe Qorrin”.
Leonard Luzi, i cili u ekstradua nga Spanja më 9 nëntor, është përfshirë në këtë organizatë kriminale, ku Amarildo Nikolli ishte ekzekutori dhe Muharrem Koroveshi dhe Erjon Zejno luanin rolin e ndihmësit.
Ata ndihmuan në dërgimin e armëve në shtëpinë e Nikollit në Vlorë dhe në gjetjen e viktimave, si dhe do të ndihmonin ekzekutorin, në largimin nga vendi i ngjarjes, nëse vrasja do të kryhej.
Megjithatë, atentati nuk u realizua, pasi më 07.08.2023, gjatë një kontrolli në Vlorë, Amarildo Nikolli u arrestua dhe iu sekuestrua një pistoletë e markës Pietro Beretta, me një silenciator, me karikator të mbushur me 14 fishekë, si dhe një fishek i futur në folenë e qitjes.
Pas arrestimit, Nikolli ka vendosur të bashkëpunojë me autoritetet duke marrë statusin e të penduarit.
Amarildo Nikolli, së fundmi u bë personazh me historinë e dy motrave, që iu vendos tritol në Elbasan, ku për pasojë humbi jetën një i pafajshëm që ndodhej në banesën e tij.
