Ish-kryeministri Sali Berisha ka bërë me dije se Gjykatësi i Parisit ka pranuar padinë e tij ndaj Sekretarit Amerikan të Shtetit, Antony Blinken. Berisha e ftoi Blinken nga Kavaja të dërgojë në gjykatë çdo provë që ka ndaj tij, po garantoi se nuk kishte asgjë në dorë.
“Kam sot kënaqësinë të ndaj me ju lajmin që Gjykatësi i Parisit ka pranuar padinë e Sali Berishës. E ftoj sekretarin e shtetit, Antony Blinken, të dërgojë në gjykatën e Parisit çdo provë që ka për Sali Berishën, por ju garantoj që ka zero zero”, deklaroi Berisha.
Ai u ndal edhe te rikthimi i tij në krye të PD, ndërsa u shpreh se foltoret e tij kanë qëllimin e madh që askush të mos vendosë për demokratët. Berisha tha se ky është sovraniteti, ndërsa shtoi se në PD do të rikthehet vota.
“Atyre që flasin për kthimin e Berishës, do ju them lexoni historinë. Kthimet kanë qenë gjithmonë të suksesshme. Ndaj dhe askush të mos ketë frikë sepse rikthimi, ne këtu, dhe të gjithë ju, ne jemi pararendës të kohës. Po i prijmë kohës. Atyre që i ka mbetur ora le t’u mbesi. Ne jemi në krye të kohës. Kjo foltore, ky dialog, ka qëllime të mëdha, që askush të mos vendosë për ju. Të vendosni ju për veten tuaj, për Kavajën dhe Shqipërinë. Ky është sovraniteti. Nuk mund të vendosin për ju as ai që nuk pyet normë mbi tokë, as ata që ju përmendin barin ju. Jo jo, vendosni ju vetë. Do e shihni çfarë do bëjme ne. Ne do rikthejmë votën në PD”, ka thënë Berisha.
