Kreu i opozitës, Lulzim Basha është i ftuar këtë mbrëmje në Syri Tv në emisionin e gazetarit Çim Peka ku iu është përgjigjur pyetjeve të gazetarëve. Ai ka deklaruar se do rikthehet sërish në atë studio pas 25 prillit, por atëherë si kryeministër i Shqipërisë.
“Unë shpresoj dhe besoj që në këtë studio do jem edhe para edhe pas 25 prillit. Sot jam si kandidati për kryeministri dhe pas 25 prillit shqiptarët do të vendosin ndryshimin dhe të ardhmen e tyre. Do të rikthehem me detyrën dhe përgjejësinë e drejtuesit te qeverisë së ardhshme. Besoj që përgjigjjen e morët të qartë, mbetet vetëm ta analizoni sa ta përsërisni sërish”, ka thënë Basha.
Kreu i PD ka folur edhe në lidhje me gjobën prej 110 milionë eurosh që Shqipëria duhet t’i paguajë Francesco Becchetti-t pas humbjes së gjyqit ndërkombëtar. Basha ka thënë se ka nisur konsultimet për të kaluar një legjislacion për të kaluar përgjegjësit e dëmit të shkaktuar në përgjegjësi individuale. Ai deklaroi se prokuroria shqiptare duhet të ishte tashmë duke hetuar Engjell Agaçin pas bisedave të publikuara ku i kërkon Becchetti-t të ndryshojë linjën editoriale, madje nën hetim për këtë duhej të ishte edhe Rama.
“Një nga masat që do të marrim në kuadër të korrigjimit të padrejtësive të këtyre 8 viteve do të jetë përgjegjësia personale pra përgjigja me pasuritë personale të atyre që i kanë shkaktuar dëme të kundërligjshme shtetit shqiptar me vetëdije dhe rasti i Beketi-t është fare i qartë. Një media ka zbuluar një pjesë të vendimit që më thonë është maja e ajsbergut ku përfaqësuesi i Edi Ramës ulet me Beketin dhe i thotë ndrysho linjën editoriale që të të lëmë të qetë dhe kjo është një vepër penale, natyrisht, nëse prokuroria shqiptare do të kishte duart e lira sot sekretari i përgjithshëm do të ishte i pandehur ndoshta dhe i arrestuar.
Ëngjëll Agaçi. Absolutisht po. Sot ndoshta dhe vetë kryeministri do ishte marrë i pandehur, siç janë marrë shumë nga kryeministrat, edhe presidentë të pandehur edhe në kohë fushate. Një nga vlerat e shtuara të 25 Prillit është që do t’i japë fund kulturës të pandëshkueshmërisë, gjyqtarëve dhe prokurorëve që në vend ti ndëshkojnë, kriminelët
Do të kalojmë në legjislacion për të cilin kemi nisur konsultimet tashmë me juristë të njohur ndërkombëtarë, të institucioneve ndërkombëtare për të bërë atë që njihet në terminologjinë juridike si kalimi i përgjegjësisë financiare për një dëm të shkaktuar interesit publik si përgjegjësi individuale”, tha Basha.
