Kryedemokrati Sali Berisha në një konferencë më gazetarët foli rreth marrëveshjes së Shqipërisë dhe Italisë për strehimin e emigrantëve. Ai tha se do të jetë grupi Parlamentar ai që do të vendosë nëse kjo marrëveshje do të ankimohet në Gjykatën Kushtetuese.
Ndërkohë, nuk preferoi që të flasë personalisht për këtë rast, duke iu thënë gazetarëve se nuk do që të prononcohet përpara vendimit të grupit.
“Në mbledhjen e fundit të grupit parlamentar është bërë një diskutim i gjatë, por pa konkluzicion. Kjo u shty që të vazhdojë në një mbledhje të veçantë. Do të mblidhet grupi dhe do ta vendosë. Nuk do të prononcohem para vendimit të grupit, do të mbështes vendimin e tij”, u shpreh ish-kryeministri.
Po çfarë mendonte Berisha më parë për këtë marrëveshje?
Kujtojmë se më parë Berisha shprehej se kjo marrëveshje mes Ramës dhe Melonit është e dëmshme dhe e papranueshme, pasi sipas tij ky pakt bie në kundërshtim të hapur me Kushtetutën e Shqipërisë dhe Konventën Europiane të të Drejtave të Njeriut, vendimet e Gjykatës Ndërkombëtare të Strasburgut për të drejtat e Njeriut.Ai madje theksoi se Rama nuk mund të garantojë respektimin më minimal të të rejtave të refugjatëve.
Këtë herë duket se Berisha është më i tërhequr në fjalimet e tij, kur vjen puna për këtë marrëveshje.
