Kryeministri Edi Rama ka nisur një video-live mëngjesin e sotëm, për t’iu përgjigjur disa prej pyetjeve të ndjekësve të tij në rrjetet sociale, për rritjen e çmimit të energjisë elektrike.
“Përshëndetje, e kam ndjekur me shumë vëmendje gjithë reagimin lidhur me krizën energjitike dhe raportin e komenteve tuaja këtu në këtë faqe mbi këtë krizë. Me një numër komentesh përfaqësues do të mundohem të bëj disa sqarime shumë të thjeshta”, e ka nisur Rama fjalën e tij.
Komentit të parë, se Shqipëria e prodhon vetë energjinë elektrike dhe nuk e blen në bursë, kështu që mund ta vendosë edhe çmimin, Rama iu përgjigj se nuk ndodh kështu.
“Ne prodhojmë kur kemi reshje të mjaftueshme për mbushjen e hidrocentraleve dhe blejmë kur kemi thatësirë. Shqipëria është e varur nga tregu ndërkombëtar njësoj si vendet e tjera. Ne prodhojmë vetë vetëm një pjesë të energjisë që konsumojmë, edhe sot që flasim çmimi i energjisë për familjarët është nën kostot reale. Për shkak se subvencionohet nga shteti”, ka thënë Rama.
Ai shtoi se Partia Socialiste e ka marrë sektorin e energjisë në një gjendje mjaft e të keqe dhe e ka çuar këtu ku është sot, teksa theksoi se vendi ynë nuk e prodhon vetë gjithë energjinë elektrike që konsumon.
“Unë dal përpara popullit dhe ju shoh drejt e në sy. Ne e morëm sektorin e energjisë, jo në gropë por në humnerë dhe e çuam këtu ku është sot.
Edhe njëherë vendi ynë nuk e prodhon në vend të gjithë energjinë që konsumon”, tha Rama.
