Bilanci ditor nga koronavirusi në vendin tonë vijon të jetë në ulje, pasi edhe sot u raportuan vetëm 4 raste të reja, duke dhënë shpresa se tashmë kemi arritur në fund të ashtuquajturës ‘lufta me armikun e padukshëm’.
Tashmë, edhe për vendin tonë, si për shumë shtete të tjera, ka nisur faza e bashkëjetesës me Covid-19, duke iu përshtatur protokolleve të caktuara nga qeveritë dhe ekspertët, teksa ka nisur lehtësimi gradual i masave kufizuese.
Shqipëria u parashikua të shkonte drejt hapjes në 3 faza, që nisnin përkatësisht në 4, 11 dhe 18 maj.
Mirëpo, frika e ekspertëve dhe qeverisë nuk ka kaluar ende, sepse mundësia e rikthimit të një vale të dytë është gjithmonë e hapur, nëse masat nuk respektohen.
Në një konferencë online që po realizon me gazetarët, kreu i qeverisë Edi Rama, tha se ka ‘frikë’ nga hapja që po bëhet në vendin tonë dhe se rreziku ende nuk ka kaluar plotësisht.
Rama deklaroi se i trembet një faze të dytë infeksioni dhe nëse shifrat do rriten papritur atëherë do na duhet të izolohemi sërish dhe kjo do ishte e rëndë, prandaj ai bëri thirrje për kujdes maksimal.
“Ne jemi të inkurajuar nga fakti që fazën e parë të kësaj lufte e kemi kaluar me sukses. Nuk ka aspak pse kjo vihet në diskutim. Këtu nuk bëhet fjalë për suksesin e një partie por një populli. Jam i shqetësuar për fazën e dytë, pasi hapja sjell me vete rreziqe. Na duhet shumë kujdes, pasi virusi është ende mes nesh. Jemi të përgatitur për mundësinë e një vale të re infektimesh dhe vazhdojmë punën me strukturat tona për ta përballuar këtë luftë”, tha Rama.
Kryeministri Rama prej disa orësh ka nisur një video-konferencë me gazetarë të ndryshëm, ku po flet rreth gjendjes aktuale në vendin tonë si për epideminë, ashtu edhe për politikën.
https://www.facebook.com/edirama.al/videos/2305388889762205/
