Ditën e sotme Policia bashkiake ka dorëzuar në ambientet e Teatrit Kombëtar një dokument, ku bëhet me dije se teatri tashmë është pronë e Bashkisë dhe do marrin në dorëzim godinën.
LEXO: Tensionohet situata tek Teatri Kombëtar! Policia çon akt-konstatimin, aktorët: Nuk tërhiqemi
Nga ana tjetër, Aleanca për Mbrojtjen e Treatrit është mbledhur në sheshin e Teatrit Kombëtar dhe është shprehur se nuk do e lejojë këtë gjë, e ka paralajmëruar përplasje e gjakderdhje.
I këtij mendimi është edhe aktori Neritan Liçaj, i cili tha se artistët do rezistonin dhe nëse do kishte dhunë nga ana e policisë, ata do i përgjigjeshin me dhunë.
Në një lidhje direkte me News 24, aktori nuk i kurseu akuzat dhe gjuhën e ashpër ndaj kryebashkiakut Veliaj, duke deklaruar se do “hajë kokën” edhe tek Teatri, ashtu si me projektin e Unazës së Re.
“Na u dorëzua një defter bakalli, në bazë të vendimit të Këshillit të Ministrave ky territor i kalon bashkisë. Vendimi është nul, sepse ka një gjë më të madhe se ai, është ligji special për teatrin. Ligji special Fusha bëhet nul kur qeveria e tërheq nga parlamenti. Ne jemi çlirimtarët, kryetari i paligjshëm i Bashkisë është talebani i radhës që vjen t’u zhapikohet mureve të këtyre kështjellave. Brenda teatrit është një pasuri e jashtëzakonshme, ka qënë qytetari që ka paguar, është vlerë shpirtërore dhe historike. Kryetari të vijë këtu, bujrum ose do i shkojmë te Bashkia ta nxjerrim me shkelma se është i paligjshëm si kryebashkiak. Ai e ka shumë keq punën edhe te Unaza e Re, të ketë kujdes, do ia hanë kokën edhe tek Unaza edhe këtu! Ne do ta mbrojmë Teatrin si në 24 korrik, hapat tona dihen, janë hapa ligjore. Ai të japë përgjigje në SPAK, ne do vazhdojmë të ngremë padi për këtë zhapikorin e bashkisë. Ne nuk duam përplasje civile por nëse ata do këmbëngulin, akteve të dhunës i përgjigjemi me dhunë”.
Kujtojmë se që prej mesit të korrikut të vitit të kaluar “Aleanca për Mbrojtjen e Teatrit” qëndron me turne gjatë 24 orëve në ambientet e tij, për të mos lejuar zbrazjen e Teatrit Kombëtar.
