13 persona janë shoqëruar mbrëmjen e sotme në komisariate të ndryshme policie në Tiranë pas protestës së mbajtur kundër nismës “Open Balkan” gjatë të cilës u dogj dhe flamuri serb. Paraprakisht raportohet se tre prej 13 të shoqëruarve kanë lidhje me djegien e flamurit, ndërsa për të tjetër nuk jepen detaje.
Një prej të shoqëruarve ishte minoren dhe është liruar pas orës 22:00, ndërsa pjesa tjetër është e shpërndarë në komisariate të ndryshme. Në komisariatin numër 1 janë shoqëruar 5 persona, në komisariatin numër 2 janë shoqëruar fillimisht 4 persona mes tyre dhe minoreni.
Mes të shoqëruarve bëhet me dije se është edhe një 84-vjeçar që ka dhe sëmundje, ndërsa për të tjerët nuk dihen detaje. Policia e Tiranës nuk ka dhënë një njoftim zyrtar në lidhje me shoqërimet që ka bërë apo akuzat që rëndojnë mbi ta. Nuk dihet nëse për personat e shoqëruar është prerë fletë-arresti.
Gjithashtu po vrojtohen kamerat nga vendngjarja për të identifikuar dhe shoqëruar persona të tjerë që protestuan ditën e sotme, kundër nismës së Ballkanit të Hapur. Gjithashtu pas përfundimit të protestës janë inspektuar vendet ku janë djegur flamujt për të mbledhur materialet hetimore.
Kujtojmë se flamuri serb është djegur para godinës së Kryeministrisë së Shqipërisë. Pamjet e siguruara nga tregojnë momentin kur disa të rinj i vënë zjarrin flamurit serb pikërisht në ditën kur Presidenti i Serbisë Aleksandër Vuçiç ndodhet në Tiranë.
