Pirro Vengu e nisi ditën e punës duke u kallëzuar në SPAK edhe pse prej kohësh këto denoncime kanë shkuar në “vesh të shurdhër” përderisa nuk ka ende persona të vënë në pranga.
Vetëm dy ditë më parë Vengu u “pagëzua” si ministër i Mbrojtjes nga Rama. Firmosjet vend e pa vend të tij në shkelje të ligjit në fakt datojnë që në 2019, atëherë kur ai mbante postin e Drejtorit të Portit të Durrësit. Pikërisht për këtë rast ai është kallëzuar në SPAK në lidhje me një procedurë të ndjekur në kohën kur ai mbante këtë detyrë.
Procedura e tenderit, sipas PD, është realizuar në muajin Korrik 2024 nga Autoriteti Portual Durrës, i cili ka nënshkruar një kontratë konsulence me kompaninë hollandeze Royal Haskoning DHV, me vlerë 12 milionë euro, për mbikëqyrjen e punimeve për ndërtimin e portit të ri të integruar të Durrësit në Porto-Romano.
Edhe njëherë Vengu zgjodhi rrugën më të shkurtër të vjedhjes nga buxheti i shtetit, duke ndjekur një procedurë pa garë, dhe në shkelje të barazisë. Vengu i cili tani na u bë dhe ministër Mbrojtjeje, në fakt ka një të shkuar “VIP” me skandale sa i takon tenderëve dhe abuzimit me arkën e shtetit.
Ai është një nga protagonistët e projektit në Portin e Durrësit, vjedhja më e madhe e pronës publike. Miliarda lekë nga buxheti i shtetit kanë përfunduar për gjelbërimin e kullave të arabëve, vinçat, zyra modulare e trajnime. Ai i ka shtrirë “tentakulat” e zhvatjes kudo në Portin e Durrësit dhe e ka bërë rrugë talljen me buxhetin e shtetit, megjithatë sot mban postin e Ministrit të Mbrojtjes.
Ndërsa xhepat e qytetarëve zbrazen në çdo lëvizje që kreu i qeverisë bën në kabinetin e tij, sigurohet që oligarkët t’i mbajë sa më afër vetes. Kryeministri mund të dalë ditën dhe natën të deklarojë se jemi vendi i vogël, se kaq i kemi të ardhurat por kryeministri ka në dorë mekanizmat për kontrollin e procedurave për fondet publike dhe mekanizmat për të gjetur abuzuesit. Në vend të kësaj ai po i fsheh nën mëngë “AS-at” e tij. Tashmë na mbetet të shohim se çfarë do bëjë SPAK, do heshtë si në shumë raste të tjera, apo do i vërë pranga ministrit të sapo emëruar të Mbrojtjes.
Gazeta Reforma
