“Torturuesit nuk duhet të lejohen kurrë të shpëtojnë nga përgjegjësia për krimet e tyre, dhe sistemet që e mundësojnë torturën duhet të çmontohen ose të transformohen plotësisht,” deklaroi Sekretari i Përgjithshëm i OKB-së, António Guterres, me rastin e Ditës Ndërkombëtare për Mbështetjen e Viktimave të Torturës.
Tortura është një krim i dënueshëm sipas së drejtës ndërkombëtare. Është rreptësisht e ndaluar dhe nuk mund të justifikohet në asnjë rrethanë. Kur praktikohet në mënyrë të sistematizuar ose të përhapur, ajo përbën krim kundër njerëzimit. Çdo shtet është i detyruar ta respektojë, edhe nëse nuk ka ratifikuar traktate të veçanta që e ndalojnë atë.
Që në themelimin e saj, Organizata e Kombeve të Bashkuara e ka dënuar torturën si një nga aktet më çnjerëzore që mund të kryejë njeriu ndaj njeriut. Kjo ditë ndërkombëtare shërben si një kujtesë e fuqishme për të ritheksuar se tortura nuk ka asnjë justifikim.
Më 12 dhjetor 1997, Asambleja e Përgjithshme e Kombeve të Bashkuara shpalli 26 Qershorin si Ditën Ndërkombëtare në Mbështetje të Viktimave të Torturës, me qëllim që të nxisë çrrënjosjen e saj të plotë dhe të garantojë zbatimin efektiv të Konventës kundër Torturës dhe Trajtimit ose Ndëshkimit Mizor, Çnjerëzor apo Poshtërues.
Fatkeqësisht, në ditët e sotme po vërehet një rritje e përdorimit të torturës në mbarë botën, e cila lidhet edhe me shtimin e numrit të konflikteve të armatosura, që nga përfundimi i Luftës së Dytë Botërore. Sipas Komitetit Ndërkombëtar të Kryqit të Kuq, aktualisht në botë janë në zhvillim mbi 100 konflikte të armatosura.
Edhe pse mbrojtja e sigurisë kombëtare dhe kufijve përdoret shpesh si arsyetim për përdorimin e torturës apo trajtimeve çnjerëzore, pasojat e këtij akti shkojnë shumë përtej individit. Tortura lë pasoja afatgjata psikologjike dhe sociale, duke ndikuar jo vetëm tek viktimat, por edhe tek familjet dhe komunitetet, dhe shpesh përjetëson cikle dhune që kalojnë brez pas brezi.
