19 maji shënon Ditën Ndërkombëtare të Lojës së Ndershme (World Fair Play Day), një ditë dedikuar promovimit të vlerave si miqësia, solidariteti, toleranca, përfshirja dhe mosdiskriminimi në sport.
Kjo është hera e parë që kjo ditë festohet zyrtarisht, pas miratimit të rezolutës përkatëse nga Asambleja e Përgjithshme e OKB-së më 1 korrik 2024.
Loja e ndershme, e njohur në mbarë botën si “Fair Play”, nxit respektin mes pjesëmarrësve dhe promovon barazinë, duke bashkuar kultura të ndryshme dhe fuqizuar të rinjtë.
Ajo tregon se sporti mund të jetë një mjet i fuqishëm për ndryshime sociale dhe për ndërtimin e komuniteteve më të bashkuara dhe të qëndrueshme.
OKB-ja thekson se të gjithë përfitojnë kur respektohen parimet e lojës së ndershme, si respekti ndaj rregullave, ndaj kundërshtarëve dhe lufta kundër dhunës dhe dopingut.
Rezoluta vë në pah rëndësinë e sportit për promovimin e paqes, zhvillimit social, përfshirjes së personave me aftësi të kufizuara, barazisë gjinore dhe fuqizimit të grave dhe vajzave.
Gjithashtu, riafirmohet pavarësia e organizatave si Komiteti Ndërkombëtar Olimpik dhe Paralimpik, duke u bërë thirrje të gjitha komuniteteve globale të njohin dhe të përkrahën Ditën Botërore të Lojës së Ndershme. /r.e/a.f/
