Me rastin e Ditës Ndërkombëtare të Grave po zhvillohet në Tiranë një marshim në kërkim të të drejtave të grave shqiptare.
Përveç grave e vajzave pjesë e marshimit janë edhe aktivistë dhe burra, të cilët kanë marshuar drejt Drejtorisë së Policisë.
“Jemi gra, duam të drejta” është parulla kryesore e këtij marshimi simbolik, ku nuk kanë munguar as pankartat e tjera me mesazhe domethënëse.
Ky marshim ishte paralajmëruar edhe më herët, ku në rrjetet sociale nisi një fushat sensibilizimi me hashtagun ‘Harram qumështi i nënës’.
Kjo fushatë u nis nga blogerja Zhaklin Lakatari, por pjesë e saj u bënë edhe shumë figura publike, por jo vetëm.
‘Është momenti të luftojmë për të drejtat tona duke prishur barrierat dhe muret imagjinare qe na janë imponuar nga ideologjia dhe sistemet shtypëse. Është momenti të tregojmë të gjithë solidaritet dhe të bashkëpunojmë. Prandaj në datën 8 Mars marshojmë për barazi, edhe gjinore.”
Po ashtu, edhe në Durrës gratë po zhvillojnë një protestë, teksa në duar ata kanë mbajtur parullat, “Ndal dhunës më tepër dashuri”.
Kujtojmë se tragjedia e 25 marsit të 1911, në New York, ku një zjarr shkaktoi 146 viktima, shumica e tyre emigrante, do bënte që 8 marsi të shpallej Dita Ndërkombëtare e Gruas.
Po ashtu, në vendin tonë 8 marsi njihet edhe si ‘Dita e Nënës’.
