Ditën e sotme disa studentë nga Universiteti i Tiranës dhe aktivistë të Lëvizjes Për Universitetin janë mbledhur para Ministrisë së Arsimit për të bërë një aksion simbolik. Aksioni lidhej me datën 8 dhjetor, Ditën e Rinisë, e cila sipas tyre nuk është më dita e tyre.
Me valixhe nëpër duar, mbi të cilat ishin të vendosuara arsyet se pse ikin të rinjtë nga Shqipëria, ata i bënë thirrje ministrisë që të marrë seriozisht statusin e tyre social në shoqëri dhe të rritet cilësia në arsim.
Ata renditën arsyet se pse sot Dita e Rinisë nuk është më dita e tyre.
“Sot duhet të ishte vërtet Dita e Rinisë, dita që të na ndërmendte suksesin historik të përpara tri dekadave, dita kur duhej të ishim entuziastë dhe plot shpresë. Në realitet, dita e sotme na gjen ne, si të rinj, në krizën më të madhe të besimit tek e ardhmja.
Këtë e dëshmojnë rrugët e boshatisura të qyteteve nga të rinjtë, reduktimi i numrit të studentëve, degradimi i arsimit parauniversitar dhe mungesa e perspektivës për punë në profesion. Të rinjtë po ikin masivisht jashtë Shqipërisë, të vetëdijshëm se korrupsioni dhe nepotizmi ua pengojnë rrugën e arritjeve profesionale.
Pagat e ulta, zhdukja e meritokracisë, varfëria, monopolet, sundimi i oligarkisë, mungesa e shtetit social dhe shndërrimi i qyteteve në hapësira gjithnjë e më të ngushta janë simptomat e një krize e cila po godet në radhë të parë rininë.
8 Dhjetori do të bëhet dita më e rëndësishme për ne, dita që na kujton rolin historik që kemi si të rinj, dita që na thërret të dalim në rrugë për të vendosur përfundimisht demokracinë, drejtësinë shoqërore dhe meritokracinë”, u shprehën ata.
