Banorët e Rrjollit kanë hyrë sot në ditën e gjashtë të protestës kundër ndërtimit të një resorti turistik në bregdetin e Velipojës. Situata është përshkallëzuar, pasi protestuesit janë zhvendosur drejtpërdrejt në kantierin e ndërtimit, aty ku mjetet e rënda të GENER 2 po kryejnë punime për ngritjen e resortit “Blu Borgo” të Ulajt, me firmë të Belinda Ballukut.
Banorët e zonës e cilësojnë projektin si një grabitje të hapur të pronave të tyre dhe paralajmërojnë se nuk do të tërhiqen. Ata pretendojnë se janë pronarë legjitimë të tokës ku po ndërtohet, duke theksuar se disponojnë dokumentacion të rregullt për rreth 400 dynym tokë, të mbështetur nga një vendim gjykate i vitit 2006 dhe një ligj i vitit 2008.
Një përfaqësues i banorëve, gjatë fjalës së tij në protestë, deklaroi se rezistenca do të vijojë dhe se mobilizimi pritet të rritet ndjeshëm në ditët në vijim. Ai theksoi se protesta nuk do të ndalet as sot dhe as gjatë këtij muaji, duke bërë thirrje institucioneve shtetërore dhe SPAK-ut që të shqyrtojnë dokumentet e pronësisë dhe të ndërhyjnë për zgjidhjen e konfliktit.
“Unë jam i përfaqësuesi i Shullajve, që kemi letrat e tokës, 400 dynym tokë. Që e kemi bërë me dokumenta të rregullta. Në 2006-ën kemi një vendim gjykate që e kemi fituar. Në 2008-ën Sali Berisha ka nxjerrë një ligj që ne e kemi fituar me urdhër të premë. Edhe ne fjetëm mendjen…
Sot është dita e gjashtë. Dje kemi bërë një protestë shumë pak njerëz, por kemi bërë një protestë që është e papame. Sot po mblidhet populli, e shihni vetë. Çfarë do të vijnë, do të shihet javën tjetër. Kjo do të jetë një protestë që nuk do të mbyllet as sot, as këtë muaj. I bëjmë thirrje shtetit. I bëjmë thirrje tërë shtetit tonë, shtetit shqiptar. T’i vënë këto letra në dukje.
I bëjmë thirrje SPAK-ut. Kemi qenë përpara SPAK-ut, një vit po bëjmë në maj, që na ka çuar, para 10 ditësh na ka çuar në Shkodër. Ne jemi, të hënën do të bllokojmë derën e Shkodrës, te prokuroria. Dhe janë pak sot çfarë do të shkojnë të hënën në Tiranë. Punëtorët e firmës janë duke punuar, gjithçka në këtë dynym janë duke punuar. Sot për sot, nuk e di a janë duke punuar, a janë duke punuar prapë? Janë bllokuar fije… a janë bllokuar se na ka policë pak? A janë bllokuar se u duket popull shumë?
Ata ta zgjidhin vetë. Por kjo do të jetë një protestë që nuk do të bëjmë vaki në tërë botën, që do të jetë protesta më e madhe ndonjëherë. Kjo protestë as mbyllet sot, as këtë muaj. I bëjmë thirrje që tërë emigrantët, të mblidhen në këtë tokë. T’i dalim zot tokave të parëve tanë, që na e kanë lënë me djersë, ka ndenjur zveshur, zbathur, ka jetuar në kasolla, nuk ka jetuar luksoze.”
Banorët paralajmërojnë se protestat do të intensifikohen edhe më tej, me lëvizje drejt institucioneve të drejtësisë në Shkodër dhe Tiranë, ndërsa theksojnë se qëllimi i tyre është mbrojtja e pronave të trashëguara dhe ndalimi i punimeve që, sipas tyre, po kryhen në mënyrë të paligjshme.
