Policia e Shtetit ka ndërmarrë masa për protestën e nesërme që do të zhvillohet nga opozita dhe Aleanca për Mbrojtjen e Teatrit para Bashkisë së Tiranës.
Siç është njoftuar tubimi do të mbahet nesër në orën 10:00, pranë Bashkisë së Tiranës, ndaj do të ketë një bllokim të përkohshëm të qarkullimit në bulevardin kryesor pranë Bashkisë së Tiranës. Kështu që qytetarët që nesër do të duhet që të përdorin mënyra alternative për të vijuar me lëvizjen. Policia sugjeron linja si Unaza e Mesme dhe Unaza e Madhe. Po ashtu, Policia ka edhe një kërkesë për qytetarët që do të marrin pjesë në tubim, duke kërkuar që të jenë të paqtë dhe të mos përdorin molotovë si në rastet e tjera.
“Policia u bën thirrje organizatorëve, drejtuesve dhe pjesëmarrësve në tubime të respektojnë ligjin dhe të distancohen nga çdo akt dhune. Cenimi i rendit e sigurisë publike dhe rrezikimi i shëndetit e jetës së punonjësve të policisë përbëjnë shkelje të ligjit dhe Policia e Shtetit do të veprojë gjithnjë me profesionalizëm,”-bën me dije Policia.
NJOFTIMI I PLOTË:
Tiranë
Gjatë dy tubimeve të fundit, të zhvilluara nga Aleanca për Mbrojtjen e Teatrit, në sheshin para Bashkisë Tiranë, janë evidentuar raste të kundërshtimit të forcave të policisë, përdorimit dhe hedhjes së molotovëve e sendeve të tjera, në drejtim të Bashkisë Tiranë, duke rrezikuar seriozisht jetën dhe shëndetin e punonjësve të policisë. Drejtoria Vendore e Policisë Tiranë respekton plotësisht të drejtën e qytetarëve për të organizuar dhe marrë pjesë në tubime paqësore. Policia u bën thirrje organizatorëve, drejtuesve dhe pjesëmarrësve në tubime të respektojnë ligjin dhe të distancohen nga çdo akt dhune. Cenimi i rendit e sigurisë publike dhe rrezikimi i shëndetit e jetës së punonjësve të policisë përbëjnë shkelje të ligjit dhe Policia e Shtetit do të veprojë gjithnjë me profesionalizëm.
Protesta e nesërme e opozitës do të jetë e katërta në radhë para Bashkisë së Tiranës në lidhje me dosjen “5D”. Incidentet e raportuara nga kjo protestë ishin të tilla si: hedhja e bojës apo e koktejleve molotov në drejtim të godinës së Bashkisë. Këto incidente sollën edhe reagimin e ambasadave të cilat dënuan dhunën.
