Ditën e sotme greva e grave naftëtare në Uzinën e Ballshit ka hyrë në ditën e 20-të të saj.
Edhe pse janë në një gjendje të rënduar shëndetësore, gratë naftëtare janë të vendosura që të qëndrojnë deri në fund dhe nuk do të lëvizin nga rafineria pa marrë përgjigje nga kryeministri Rama.
Mesa duket gratë naftëtare nuk e kanë në plan që të ndalen, po tentojnë që të vazhdojnë rezistencën e tyre, në mënyrë që të marrin në fund pagat e prapambetura dhe pse jo të rinisin punën në rafineri.
Grevistet tashmë prej 20 ditësh, kërkojnë që kryeministri Rama t’i shkojë në grevë dhe të bisedojnë, mirëpo kryeministri është shprehur që greva si fillim duhet të mbyllet e më pas do nisin negociatat.
Naftëtarët e uzinës në Ballsh kanë hyrë në një grevë urie prej 22 ditësh, ndërsa prej 20 ditësh atyre iu janë bashkuar edhe gratë e tyre.
Grevistët ndërkohë kërkojnë marrjen e masave urgjente nga qeveria për të siguruar pagesën e 9 muajve rrogë që e kanë fituar në gjykatë, si dhe rinisjen e punës dhe njohjen e librezave të punës ku shënohen sigurimet shoqërore dhe vitet e punës.
Ata refuzuan pak ditë më parë edhe thirrjen e kryeministrit Edi Rama, i cili i kërkoi ndërprerjen e grevës dhe nisjen e dialogut me qeverinë, por pa zgjidhje konkrete./GazetaReforma.com/
