Studentët e universiteteve publike kanë paralajmëruar sot, në ditën e 13-të, një protestë masive e cila nuk do përfshijë vetëm studentët por janë të ftuar të marrin pjesë edhe qytetarë nga gjithë Shqipëria të cilët e ndjejnë veten që duhet t’u bashkohen. Ata shprehen se protesta do jetë paqësore dhe do vazhdojë deri në plotësimin e kërkesave të tyre. Studentët kanë theksuar se protesta nuk do marrë ngjyra politike për këtë arsye shprehen se edhe nëse dikush nga politika merr pjesë, do jetë si qytetar i thjeshtë pa pasur të drejtën e fjalës.
Partitë politike, si rasti i LSI-së , u kanë bërë thirrje të rinjve të tyre t’i bashkohen studentëve, mirëpo këta të fundit janë dakord por pa lejuar që ata të paraqiten si pjestarë të partisë por si qytetarë të thjeshtë. Grumbullimi i studentëve ka filluar dhe protesta pritet të fillojë në orën 11:30 përpara kryeministrisë. Ndërkohë studentë të rretheve janë duke marshuar drejt kryeqytetit për t’ju bashkuar pjesës tjetër të protestuesve.
Ndonëse thirrjet e tyre për plotësimin e kërkesave janë cdo ditë , kryeministri Rama ka deklaruar se është dakord me 8 pikat e tyre, por ҫdo gjë përmes dialogut. Nëse nuk do ketë dialog, atëherë nuk do ketë as zgjidhje të tyre.
Në postimet e fundit në rrjetet sociale ai ka publikuar foto të një proteste në SHBA e cila sipas tij tregon se studentët po protestonin dhe kërkonin dialog nga qeveria, ndërsa në rastin tone dialogu është dhe nuk duan studentët.
Kujtojmë se ata po mbajnë qëndrimin që kanë patur që në fillim, pra pavarësisht deklaratave të tij, studentët janë kundra dialogut dhe negociatave.
