Disa çështje janë aq të rëndësishme për t’u zgjidhur, saqë qeveria është duke kërkuar ndihmën e opozitës së re, ende pa u krijuar. Ka qenë Ministria e Shtetit për Marrëdhëniet me Parlamentin, Elisa Spiropali, e cila i ka kërkuar opozitës së re që të ulen dhe të diskutojnë me qeverinë draftin e reformës zgjedhore, e cila këtë herë do të përfshijë edhe votën e emigrantëve.
“Për fat të keq, bllokimi i Kuvendit nga opozita e ka bërë të pamundur debatimin e kësaj teme me rëndësi kombëtare, ndaj gjejmë rastin që t’i bëjmë thirrje e njëkohësisht të theksojmë se mbetemi shpresëplotë që opozita të marrë seriozisht këtë çështje, duke e bërë pjesë të bisedimeve të reformës së ardhshme zgjedhore. Bashkëpunimi i opozitës së re në Kuvend do të nevojitet edhe për kalimin e ndryshimeve në vetëqeverisjen vendore, një ligj që kërkon 3/5 për të bërë realitet krijimin e një zyre speciale, të dedikuar për diasporën në çdo njësi administrative”, tha Spiropali.
Përpos Spiropalit, ka qenë edhe kreu i Grupit Parlamentar të PS-së, Taulant Balla ka thënë se vendet e lëna bosh nga opozita e vjetër do të plotësohen me 4 deputetë nga radhët e LSI-së që pranuan mandatin.
“Procesi i mbushjes së Kuvendit me deputetë do vijojë. Se vetëm në Tiranë ka pasur 50 kandidatë PD. Kjo është një krizë brenda tyre, e shpikën këtë krizë me një mekanizëm që dihet ku do t’i çonte”, tha Balla.
