Zv.shefi i ambasadës së SHBA në Tiranë, Dan Koski, ka dhënë një mesazh të fuqishëm lidhur me reformën në drejtësi, gjatë një aktiviteti të USAID-it në Tiranë.
Sipas tij, ndryshimet në ligj janë një lajm i keq për zyrtarët e korruptuar, ashtu si rëra në ingranazhe, shkruan “Shqiptarja.com”.
Më tej ai ka shtuar se këto persona do të tentojnë të bllokojnë përpjekjet për të çuar përpara reformën.
Gjithashtu Koski ka garantuar mbështetjen e SHBA, derisa Shqipëria ta fitojë këtë luftë.
“...jo të gjithë ndajnë qëllimet tona për të përmirësuar zbatimin e ligjit dhe qeverisjen e mirë në Shqipëri. Për zyrtarët e korruptuar, ndryshimi që ne po sjellim është një lajm i keq. Është si rëra në ingranazhe, e cila shumë shpejt do bëjë që aktivitetet e tyre korruptive të ndalen. Ne e dimë se ata do të luftojnë dhe do të përpiqen në çdo moment të bllokojnë përpjekjet tuaja për të çuar përpara këto qëllime të rëndësishme. Mos u stepni. Mos u shkurajoni. Vazhdoni të qëndroni në këmbë dhe të luftoni për reformat që do të forcojnë shoqërinë shqiptare për ju dhe brezat e ardhshëm. Ju besoni që në horizont është një e ardhme më e ndritur për Shqipërinë. Të njëjtën gjë mendojmë edhe ne, dhe do ta vijojmë këtë rrugëtim së bashku me ju” deklaroi Koski.
Ndër të tjera zyrtari i SHBA dha edhe një këshillë për qeverinë shqiptare.
Koski tha se duhen çuar deri në fund reformat, si dhe duhen mobilizuar burimet kombëtare, pasi doncacionet nuk do të zgjasin gjithmonë.
“Donatorët nuk do të dhurojnë përgjithmonë. Sfida e Qeverisë së Shqipërisë do të jetë mobilizimi gjithnjë e më i madh i burimeve të saj kombëtare për të përparuar këto synime të rëndësishme zhvillimi. Vazhdoni të qëndroni në këmbë dhe të luftoni për reformat që do të forcojnë shoqërinë e Shqipërisë për ju dhe brezat e ardhshëm. Ju besoni në një të ardhme më të ndritshme për Shqipërinë. Kështu bëjmë ne, dhe ne do të vazhdojmë të jemi partneri juaj ndërsa realizoni atë qëllim” përfundoi Koski.
