Marjan Laca, drejtori i Antikontrabandës në Drejtorinë e Përgjithshme të Doganave, është kërcënuar nga vartësi i tij.
Sipas gazetë ‘Si’ Laca ka dorëzuar në polici një kallëzim penal ndaj një punonjësi me emrin Ermal K.
Ai ka thënë për policinë:
“Duke qenë se ushtroj këtë kontroll, puna ime është në kontrollin e gjithë territorit të vendit në fushën doganore. Nën varësi kam gjithsej rreth 100 persona, këta në funksione të ndryshme. Puna është e ndarë në grupe të përbërë nga tri veta që ushtrojnë kontrollin në pika të ndryshme doganore, det dhe tokë. Në varësinë time kam edhe punonjësin Ermal K. , i cili është përgjegjës grupi i Antikontrabandës tokësore. E kam gjetur në këtë detyrë kur mora detyrën e drejtorit. Në datën 5 dhjetor 2019, ishte ditë e enjte, rreth orës 20:00, kur gjendesha në banesën time, më vjen një SMS në WhatsApp. Ky numër i përket vartësit.
Mesazhi i parë ishte me tekst “Përshëndetje zoti Laca. Ka gjithë jetën që merrem vetëm me punët e mia. Ju që kur më njihni jeni marrë vetëm me punët e mia. Përse zotëria juaj? Ca të kam ba?. Por meqë e paske kthyer në personale, dy duart për një krye janë, të kam thënë edhe herë tjetër, nuk të kam as hakë as hile, por nuk me paske nie. Fjalë malësori, mu ruaj, dhe mos harro di shumë gjëra për ju. Mund ta shkatërroj jetën tuaj në dy orë. Nuk ia kam ba njeriu, por ti më detyron”.
Drejtori tregon në polici se pasi lexoi mesazhin i është përgjigjur se “po bën gabim që po i shkruan” dhe se “po bëj punën time si me ty, si me ata që shkelin ligjin. Pushka top t’u bëftë ty dhe kujtdo tjetër që kërkon të më intimidojë në punën time”, mësohet t’i ketë thënë shefi vartësit të tij. Denoncuesi kujton se pas këtij reagimi se vartësi ka vazhduar me mesazhe kërcënuese mes tyre edhe fraza “do ju vij te shtëpia”.
Kush është Marjan Laca?
Marjan Laca në kohën e PD-së ka qenë kryekomisar në polici dhe në vitin 2013 ka qenë shef qarkullimi i Policisë Rrugore.
Ai ka mbajtur postin e shefit të komisariatit nr4 në Tiranë, po në kohën e qeverisjes nga Partia Demokratike dhe pas këtij posti është emëruar shef komisariati në qytetine Elbasanit.
Më vonë ai u zgjodh për të qenë në grupin e shoqërimit të ish-kryeparlamentares Jozefina Topalli.
