Ditën e sotme në vendin tonë mbërritën 10 mijë dozat e para të vaksinës ruse Sputnik V, të cilat ishin dhuratë nga Princi i Emirateve të Bashkuara. Vaksina ruse mbërriti në Shqipëri pas vendimit të qeverisë në 11 mars që i hapte rrugë edhe vaksinave që ende nuk ishin certifikuar nga EMA apo OBSH, por kishin kaluar provat në agjencitë e barnave në vendet ku ishin prodhuar.
Ndërkohë që vendi përballej me një situatë të rëndë të pandemisë, kryeministri Rama e kishte quajtur para tre muajsh oferëtn e Ambasadës Ruse për vaksina, një provokim. Për të qëndruar në një linjë me shtetet perëndimore Rama nuk pranoi vaksina, madje pati një reagim të ashpër.
“Kam menduar që ka qenë një meme, ajo që pashë që ambasada e Rusisë kishte postuar nga Twitter-i i Drejtorit të Komunikimit një ripostim të shefes së KE-së. Mendova se ishte meme, pasi për një shtet serioz është krejtësisht e papërshtatshme të bëjë provokime të tilla. Kur them provokim nuk po i paraprij ndonjë demarshi pranë shtetit rus, sepse ky është një provokim qesharak dhe nuk është mirë që një vend serioz të bëhet qesharak përmes këtyre lloj postimeve. Shpreh keqardhje për këtë, se nuk shoh arsye që ambasada e Rusisë të përfshihet në prodhimin e memeve”, ishte shprehur Rama në 29 dhjetor të 2020-ës.
Qëndrimi i Ramës erdhi duke ndryshuar me qëndrimin e vendeve europiane. Sapo Gjermania filloi të jepte sinjale pozitive për vaksinën ruse, Rama filloi t’i moderonte deklaratat e tij.
“Sa i përket vaksinave në anën lindore, ajo kineze dhe ruse, asnjë paragjykim të natyrës shkencore por respekt për shkencëtarët që i kanë dhënë jetë këtyre vaksinave por zgjedhja jonë është që do të kërkojmë vaksina në krahun perëndimor të Shqipërisë. Është një zgjedhje e bërë prej nesh sepse këtu janë shumë komponentë bashkë”, tha Rama në 1 shkurt.
Më vonë duke tentuar të justifikonte veten, Rama tha se deklarata e tij për vaksinat ruse mund të ishte keqkuptuar, por ato ende nuk ishin miratuar nga OBSH.
“E kam ndjekur dhe këtë debat dhe dua të bëj një sqarim për të gjithë. Askush të mos mendojë se vaksina kineze apo ruse është në tezga dhe të paraqitesh që të paguash për ti marrë. Nuk është kështu. Dhe ndonjë shtet që ka deklaruar marrëveshjen, nuk ka marrë gjë. Merrni numrin e të vaksinuarve në Rusi. Nuk është i tillë që sasitë në dispozicion janë të mëdha. Mbase është keqkuptuar në një formë adekuate ajo cka unë kam thënë, duke harruar atë që kam theksuar që në krye të herës që nuk kemi asnjë arsye në botë që nuk kemi asnjë dyshim për vlerën e këtyre vaksinave, por nga njëra anë janë ende të paaprovuara në nivelin e OBSH-së”, ka thënë Rama në 22 shkurt.
Ndërsa Rama vazhdonte deklaratat bombastike dhe flirtet me vaksinat e lindjes për tre muaj, njerëzit në Shqipëri humbisnin jetën çdo ditë nga koronavirusi. 10 mijë dozat e vaksinës Sputnik V të ardhura sot në vendin tonë mund të kishin shpëtuar qindra jetë njerëzish dhe të kishin kursyer mijëra infektime në një kohë që sistemi spitalor është në kolaps. Por edhe njëherë, tendeca e Ramës për të rënë në sy të perëndimit dhe për të treguar që ka kontroll, i kushtoi shtrenjtë shqiptarëve.
