Një pjesë e Dibrës mbulohet nga bora, banorët e Zall-Dardhës prej ditësh të izoluar dhe pa ujë të pijshëm
Moti i keq prej ditësh ka mbërthyer vendin dhe shumë qarqe janë nën pushtetin e ujit dhe dëborës.
Banorët e Njësisë Administrative Zall-Dardhë në Bashkinë e Dibrës kanë ditë që janë pa ujë të pijshëm. Me uljen e ndjeshme të temperaturave, rrjeti i ujësjellësit nuk ka funksionuar.
Banorët thonë se kanë njoftuar të gjitha autoritetet vendore dhe ato qendrore që të marrin masa.
Situatë problematike paraqitet edhe me rrugët e fshatrave të kësaj njësie administrative pasi ka prezencë të madhe të akullit kudo dhe të dëborës që shkon deri në rreth 20 cm.
Moti, acari do të vazhdojë deri të mërkurën
Prej disa ditësh Shqipëria është e “mbërthyer” nga temperaturat e ulta që arrijnë deri në -14 gradë celcius, duke sjellë prezencë akulli dhe ngrice në pjesën më të madhe të vendit.
Ky i ftohtë ka ardhur si pasojë e ndikimit të stuhisë “Filomena”, ndërsa sipas meteorologut Hakil Osmani, kjo stuhi ka bërë që temperaturat të jenë deri në 10 gradë më të ulta se normalja.
“Këto temperatura nuk janë normale pasi stuhia “Filomena” ka sjellë vlera shumë më të ulëta në territorin shqiptar. Në Ultësirën Perëndimore kemi vlera negative gjatë orëve të mbrëmjes dhe mëngjesit në territorin shqiptar. Sa i përket të hënës pritet që këto vlera termike pritet të jenë prezente”, shprehet ai në Abc News.
Sipas tij, përmirësimi i motit do të vijë pas ditës së mërkurë, ndërsa që prej të enjtes temperaturat do të rriten, por do të rikthehen reshjet e shiut.
“Duke qenë se kemi tërheqje të masave ajrore të acarta që i kemi përjetuar gjatë stuhisë “Filomena”, kemi ardhjen e masave të ngrohta nga Mesdheu duke bërë që të kemi edhe reshje”, tha Osmani.
