Lojërat e motit janë duke bërë që këtë fund pranvere dhe fillim vere të mos ta shijojmë ashtu siç duhet, por përkundrazi të provojmë edhe një herë dimrin.
Edhe pse ky muaj ka nisur me reshje të dendura shiu dhe temperatura të ulta, në zonat malore reshjet kanë qenë dëbore.
Konkretisht në qarkun e Dibrës, reshjet e dëborës të rëna ditën e djeshme kanë shkaktuar probleme të mëdha sidomos me kulturat bujqësore. Nga raportimet në fshatrat e Lurës ka rënë rreth 5 cm borë dhe kjo ka bërë që shumë prej të mbjellave të shkatërrohen.
Gjithashtu zona të tjera që kanë hasur probleme ndoshta të pariparueshme kanë qenë edhe ato të Selishtës, Kalasë së Dodës dhe Arrasit.
Mirëpo nga ana tjetër deri më tani nuk është raportuar asnjë problem me qarkullimin e mjeteve në këto zona, kështu që mbeten të hapura për të lëvizur.
