Një fluks i shtuar i qytetarëve në Bulqizë që kanë kërkuar ndihmë mjekësore ditët e fundit, duke shfaqur simptoma diarreje dhe të vjella. Për të parë nga afër situatën me rastet e shtuara në spitalin e Bulqizës, Prefekti i Qarkut Dibër, Nexhbedin Shehu, ka bërë një vizitë në këtë institucion.
“Nga e shtuna ka fluks të shtuar e njerëzve të cilët paraqiten me simptoma diarreje dhe të vjella. Shenjat janë të lehta sipas mjekëve, bëjnë një serum dhe më pas largohen. Por fluksi është i shtuar,” tha Shehu, duke shtuar se numri i personave që kanë kërkuar ndihmën mjekësore ka arritur mbi 90.
Për të gjetur shkakun e këtij fenomeni, institucionet po kryejnë analizat e nevojshme të ujit të pijshëm. “Analizat të cilat iu bënë ujit kanë dalë mirë. Megjithatë, ka gjeografi përtej Bulqizës. Është në hetim dhe ende po presim përgjigjen e një analize të thelluar,” sqaroi Prefekti.
Ndërkohë, Shehu ka këshilluar qytetarët të përdorin ujë të blerë ose të ziejnë ujin deri në daljen e rezultateve të analizës së thelluar. “Gjej rast ti bëj thirrje popullatës të bëjnë kujdes, ta ziejnë ujin apo të përdorin ujë të blerë deri në daljen e përgjigjes së analizës. Del mbrëmjen e sotme,” u shpreh ai.
