Kryeministri Edi Rama i ka dërguar një ftesë Partisë Demokratike, LSI-së dhe aleatëve të tyre, për t’u ulur në tryezën e diskutimit për reformën zgjedhore.
Rama ka thënë ndër të tjera, se PD dhe PS, janë të dënuara të bashkëjetojnë, pavarësisht kundërshtive dhe papëlqyeshmërisë reciproke.
Sipas kreut të qeverisë,opozita që ndodhet jashtë parlamentit është votuar nga një pjesë e vogël e zgjedhësve shqiptarë.
Për këtë arsye shton ai, Kuvendi ka rezervuar një vend të posaçëm për PD dhe aleatët, në tryezën e Komisionit të reformës zgjedhore.
Ndërkohë aleatët e PD-së, nuk kanë dashur një takim kokë më kokë mes kreut të kësaj force politike, Lulzim Bashës dhe Ramës, për të mos përsëritur një 17 maj të dytë.
Palët kanë qenë të hapura që tryeza e diskutimit të kryesohet nga ndërkombëtarët, duke nxjerrë presidentin jashtë loje.
E vetmja parti që Rama nuk ka përfshirë në ftesë është PDIU e Shpëtim Idrizit
Letra e plotë e Ramës
Ftese publike drejtuesve te opozites joparlamentare Lulzim Basha, Monika Kryemadhi, Nard Ndoka, Vangjel Dule, Agron Duka, Dashamir Shehi, Fatmir Mediu
Të nderuar zotërinj, e nderuar zonjë,
Ju drejtohem publikisht në përpjekjen për të krijuar një hapësirë dialogu e ndërveprimi mes nesh, lidhur me një sfidë të përbashkët të një rëndësie kombëtare, Reformën Zgjedhore. Kundërshtitë tona në aspektin politik janë botërisht të njohura dhe pozicionet respektive, në raport me hapësirën institucionale të vendit po ashtu. Sidoqoftë, përtej skajshmërisë së dallimeve tona, ne as nuk e kemi zgjedhur njëri-tjetrin dhe as nuk e zhbëjmë dot ekzistencën e njëri-tjetrit. Pra jemi të dënuar të bashkëjetojmë pavarësisht jopëlqyeshmërisë reciproke, për sa kohë të tjerët, zgjedhësit, na kanë dhënë mandate përfaqësimi, disave për të qeverisur e disave për të bërë opozitë.
Ju vendosët t’i digjni mandatet e hyrjes në Kuvend dhe të vetëpërjashtoheni nga jeta parlamentare e kësaj legjislature. Por gjithësesi, deri në zgjedhjet e qershorit 2021, ju jeni të votuar për të përfaqësuar një pjesë jo të vogël të zgjedhësve shqiptarë. Prandaj e dhe Kuvendi ka rezervuar një vend të posaçëm për ju, në Komisionin e Reformës Zgjedhore. Procesi ka nisur në Kuvend me opozitën parlamentare dhe do të mbyllet në Kuvend natyrisht, por mungesa juaj ne institucionin më të lartë vendimmarrës të republikës, nuk ju përjashton vetvetiu nga hapësira e diskutimit për Reformën Zgjedhore. Përkundrazi. Të paktën ky është opinioni im dhe duke vënë re edhe mungesën tuaj në vetë tryezën e Komisionit Zgjedhor, ju ftoj të takohemi e të bashkëbisedojmë për këtë sfidë të përbashkët, në çdo kohë e vend që do t’ju vinte për shtat – sigurisht në rast se ju jeni të interesuar të përfshiheni në këtë proces. Pa kushte.
Ju faleminderit
EDI RAMA
Tiranë, 18 shtator 2019
