Vazhdon tallja me buxhetin e shtetit. Kreu i qeverisë, Edi Rama përmes programit “Shqipëria 1 euro” i ka bërë një tjetër “dhuratë” presidentit të fondacionit jofitimiprurës “Fundjavë Ndryshe”, Arbër Hajdari.
Me një VKM më 17 prill 2024, Hajdari ka përfituar një pronë të tretë përmes programit “Shqipëria 1 euro”.
Sipas dokumentit në “OpenCorporatesAlbania”, rezulton se ai ka marrë në zotërim pronën e një ish-reparti ushtarak depo me nr. 5011 me sipërfaqe 16 214 m2 dhe sipërfaqe ndërtim 3138 në Brar të Tiranës e cila ka qenë në përgjegjësi administrimi të Ministrisë së Mbrojtjes, me afat 20 vjet.
Ndonëse pohon se të ardhurat shkojnë gjithmonë për bamirësi, pasi fondacioni është jo fitimprurës, Hajdari pasi ka marrë në zotërim këto prona ka ndërtuar restorant, magazina, biblotekë, qendra shëndetësore me klinikën dentare, sallat e kurseve të anglishtes dhe teknologjisë, park argëtues për fëmijë, zyra, etj.
Kjo nuk është hera e parë që Arbër Hajdari me fondacionin e tij merr prona shtetërore me një qira modeste 1 euro, pasi në 5 vitet e fundit ky është vendimi i tretë i qeverisë Rama që i “dhuron” prona shtetërore bazuar në ligjin “Shqipëria 1 euro”.
“Dhurata” e parë nga Rama për Arbër Hajdarin daton më 13 mars të vitit 2019 ku me anë të Vendimit të Këshillit të Ministrave u miratua lidhja e kontratës së qirasë me tarifën “1 euro” për një truall funksional dhe objekt me vendndodhje në Brar të Tiranës, me sipërfaqe të përgjithshme 43 169, shkruan Boldnews.
Më 29 korrik të vitit 2020 sërish me anë të Vendimit të Këshillit të Ministrave, miraton shembjen e katër objekteve me qëllim final dorëzimin e kësaj sipërfaqe shtetërore në administrim të fondacionit “Fundjavë ndryshe”, sërish në zonën e Brarit në Tiranë.
