Policia e Tiranës ka zbardhur një ngjarje të rëndë të ndodhur më 5 janar 2025, ku një 48-vjeçar, Adriatik Roshi, është dhunuar me sende të forta nga gjashtë persona në një berberhane në rrugën “29 Nëntori”.
Si rezultat i operacionit policor të koduar “Details”, janë arrestuar në flagrancë Gani Koçeku, 24 vjeç dhe Ledio Tusha, 31 vjeç, ndërsa katër të tjerë janë shpallur në kërkim: Luçjano Koçeku (i njohur si Tur Koçeku), Gëzim Koçeku, Ronald Koçeku dhe Abedin Koçeku.
Hetimet zbuluan se konflikti ka lidhje me një përplasje të mëparshme mes viktimës dhe familjes Koçeku, ndodhur në një lokal në Palasë gjatë verës së kaluar.
Gjatë kontrollit në banesat e të dyshuarve, policia ka sekuestruar një armë zjarri pistoletë me leje, një armë gjahu, dy automjete të dyshuara të përdorura në ngjarje dhe veshje të përdorura nga autorët. Adriatik Roshi ndodhet në spital nën kujdesin e mjekëve.
Materialet procedurale i kaluan Prokurorisë për veprime të mëtejshme. Policia vijon kërkimet për kapjen e autorëve të shpallur në kërkim.
