Është arrestuar nga policia i dyshuari për vrasjen e 18-vjeçares në FerizaJ, Dardan Krivaqa. Lajmin e ka konfirmuar pak minuta më parë zyrtari i policisë së Kosovës. “Para dy tre minuta e kemi marrë konfirmimin se Dardan Krivaqa është arrestuar në Ferizaj”, tha ai.
Sjellim në vëmendje se një ngjarje e rëndë tronditi dy ditë më parë qytetin e Ferizajt, ku dy persona dhunuan deri në vdekje një 18-vjeçare dhe e braktisën pa shenja jete në dyert e spitalit. Ngjarja e rëndë nxiti reagime të shumta nga ana e politikës dhe jo vetëm në Kosovë. Në rrjetet sociale ka qarkulluar një video ku shihet Dardan Krivaqa, i dyshuari kryesor për vrasjen e Marigona Osmanit njëherësh edhe bashkëjetuesi i saj, që tenton të arratiset. Banorët e lagjes ku ndodhi ngjarja e rëndë janë shprehur se ai ka bërë edhe ndryshime në pamje për të mos u njohur nga Policia. Sipas tyre ai ka prerë flokët.
Kujtojmë se një nga të dyshuarit Arbër Sejdiu u arrestua nga Policia e Kosovës pak orë pasi braktisën 18-vjeçaren në derën e spitalit. Ndërkohë që avokati që ishte caktuar për të Avni Hysiqi, tha ditën e djeshme se nuk do ta mbronte të arrestuarin Arbër Sejdiu. “Nuk po kam mundësi me u marr me këtë rast. Edhe me konferenca për shtyp e sene. Edhe nuk jam i interesuar me e mbrojtë”, mësohet të jetë shprehur avokati për Gazetën Sinjali.
Më tej avokati mësohet të ketë thënë se ka lajmëruar edhe prokurorinë dhe tashmë janë në dijeni se ai nuk do ta përfaqësoj Arbër Sejdiun. Gjithashtu Hysiqi është shprehur se ky rast është tepër delikat dhe se i arrestuari duhet të gjejë një avokat tjetër për ta mbrojtur.
