Ditën e diel qyteti i Ferizajt është tronditur nga një ngjarje e rëndë, ku dy persona, Dardan Krivaqa dhe Arbër Sejdiu braktisën në dyert e spitalit pa shenja jete, 18-vjeçaren Marigona Osmanin
Marigona u dhunua deri në vdekje nga bashkëjetuesi i saj, Dardan Krivaqa i cili është arrestuar nga policia dhe ditën e djeshme u vendos masa e sigurisë “arrest me burg” për të. Krivaqa nuk ishte një emër i panjohur për drejtësinë, pasi edhe më herët ka pasur probleme me drejtësinë.
Sipas mediave kosovare, Krivaqa dyshohet se ka kryer 122 vepra penale që vijojnë si më poshtë: 11 raste për grabitje, 93 raste të vjedhjes dhe vjedhjes së rëndë, 1 rast dhunimi, 12 raste pranimi të gjërave të vjedhura, si dhe pesë lëndime trupore. Ndërsa thuhet se i riu e ka vrarë 18-vjeçaren, pasi dyshonte se ajo e tradhtonte me dalin e dajës.
E kaluara e dhunshme e Dardan Krivaqës
Dardan Krivaqa kishte ushtruar dhunë edhe ndaj të një të ish të dashure që kishte në vitin 2017. Pas dhunës sistematike që ai kishte ushtruar ndaj saj, më 10 qershor të vitit 2017 Krivaqa e kishte sulmuar me thikë familjarin e ish të dashurës për shkak se ai kishte tentuar ta largonte nga dhuna që Krivaqa i shkaktonte familjares së tij. Lidhur me këtë rast ishte hapur hetimi për “lëndim të lehtë trupor”.
Një therje tjetër, Krivaqa e kishte bërë në fund të vitit 2020 dhe atë ndaj një zyrtari policor. Sipas po të njëjtit burim, polici me inicialet Z.H. i kishte vërejtur tre persona duke konsumuar lëndë narkotike dhe sapo iu ishte afruar, Dardan Krivaqa i kishte vënë një mjet të mprehtë në fyt me ç’rast zyrtari policor ka pësuar lëndime trupore. Për të njëjtën vepër, i dyshuari Krivaqa ishte dënuar me burgim prej 180 ditësh, duke iu llogaritur edhe koha e kaluar në paraburgim.
